- वि.सं २o७९ असोज १४ शुक्रबार
म युकेमा हुर्किएको हुँ । युकेमा हुर्के–पढे पनि मलाई नेपाली समाज र संस्कृति मन पर्छ । मलाई नेपाली चाडपर्व मनाउने शैली मन पर्छ । मलाई दसैँ–तिहारजस्ता चाडपर्व मन पर्छ । युकेमै पनि नेपाली शैलीमा दसैँमा मनाइन्छ । मगर समुदायको भएकाले हामी दसैँमा सेतो टीका लगाउँछौँ । मिठो खाने र परिवार भेटघाट गर्ने अवसर हो, दसैँ ।
मलाई आमाले दसैँमा सेलरोटी पकाएर दिनुहुन्छ । अरू वेला सेलरोटी नपाक्ने होइन, तर दसैँमा चाहिँ विशेष लाग्छ । अहिले पनि बाल्यकालजस्तै दसैँको समयमा उत्साहित हुन्छु । परिवारसँग बसेर रमाइलो गर्ने माहोल बन्छ । नेपाली भएकाले जहाँ गए पनि आफ्नो संस्कृतिबाट टाढा हुन नसकिने रहेछ ।
मेरो यो वर्षको दसैँ नेपालमै बित्नेछ । अघिल्ला दुईवटा दसैँ पनि नेपालमै मनाएको थिएँ । तर, यसपटकको दसैँ मेरा लागि विशेष छ । मैले अभिनय गरेको फिल्म ‘बाबरी’ शुक्रबारबाट प्रदर्शनबाट आएको छ । फिल्म हेर्न र दसैँ मनाउनका लागि युकेबाट मेरो परिवार नै नेपाल आएको छ । परिवार नै नेपालमा बसेर दसैँ मनाउनु हाम्रा लागि विशेष क्षण हो ।
