- वि.सं २o७९ श्रावण २२ आइतबार
नेपाल सरकार लघु, घरेलु तथा साना उद्योग प्रवद्र्धन केन्द्र, नेपाल उद्योग परिसंघ र हुलास स्टिलबीच रोजगारीकेन्द्रित त्रिपक्षीय सम्झौता भएको छ । लघु, घरेलु तथा साना उद्योग प्रवद्र्धन केन्द्रले आफ्नो कार्यस्थलमा १८ वर्ष नाघेका नेपालीलाई रोजगारीमूलक तालिम दिने प्रतिबद्धतासहित त्रिपक्षीय सम्झौता भएको हो ।
सम्झौतामा उद्योग प्रवद्र्धन केन्द्रका उपसचिव ऋषिराम पंगेनी, नेपाल उद्योग परिसंघका महानिर्देशक दीपकराज जोशी र हुलास स्टिलका ब्रान्ड एन्ड कर्पोरेट कम्युनिकेसन म्यानेजर रवि केसीले हस्ताक्षर गरेको जनाइएको छ ।
सम्झौताअनुसार तीन महिनाको तालिमपश्चात् हुलास स्टिलले दुई वर्षका लागि रोजगारमूलक प्रशिक्षण कार्यक्रममा छनोटमा परेका व्यक्तिलाई नीति नियमअनुसार रोजगारीको अवसर प्रदान गर्ने जनाइएको छ ।
त्यस्तै, प्रशिक्षण तालिम अवधिको न्यूनतम खर्च भने नेपाल सरकारले व्यहोर्ने उल्लेख छ । कार्यस्थलमा आधारित रोजगारमूलक प्रशिक्षण कार्यक्रम सञ्चालन कार्यविधि,२०७९ मा रहेको प्रावधानअनुसार यो सम्झौता गरिएको जनाइएको छ ।
