- वि.सं २o७९ असार १५ बुधबार
मंगलबार बिहानदेखि अविरल रूपमा भएको भारी वर्षाले डुबान समस्या बढेपछि विराटनगर महानगरपालिकाले नगर क्षेत्रका सबै विद्यालय तीन दिन बन्द गराएको छ । भारी वर्षाले बाढीको समस्या बढेपछि मंगलबार साँझ आकस्मिक रूपमा बसेको विराटनगर महानगरको विपत् व्यवस्थापन समितिको बैठकले १५ देखि १७ असारसम्मका लागि नगर क्षेत्रका सबै विद्यालय बन्द गर्ने निर्णय गरेको हो ।
महानगरपालिका शिक्षा महाशाखा प्रमुख दुर्गाप्रसाद खतिवडाका अनुसार तीन दिनसम्म अविरल वर्षाको समस्या रहेको र बाढी र डुबानले गर्दा कतिपय स्थानका विद्यालय सञ्चालन हुन नसक्ने अवस्थामा रहेको र धेरै ठाउँमा विद्यार्थीलाई आउजाउ गर्न समस्या हुने भएकोले विद्यालय बन्द गराइएको हो । खतिवडाका अनुसार अविरल वर्षाको समस्या नभएमा विद्यालय बन्दको अवधि लम्बिन पनि सक्नेछ ।
प्रहरीका अनुसार अविरल वर्षाले गर्दा विराटनगर महानगरको १, २, ४, ६, ७, ८, ११, १२, १६ र १९ नम्बर वडाका एक हजार पाँच सय घरपरिवार डुबानमा परेका छन् । विस्थापितलाई उद्धार गरेर सुरक्षित स्थानमा सारिसकेको र थपलाई सार्ने काम भइरहेको प्रमुख जिल्ला अधिकारी काशीराज दाहालले जानकारी दिए । अविरल वर्षाले गर्दा विराटनगर–रंगेली सडकखण्डअन्तर्गत हुलाकी राजमार्गमा पर्ने रंगेली नगरपालिका– १ मंगलबारेमा रहेको कल्भर्ट बगाएपछि सवारी आवागमन अवरुद्ध भएको छ ।
बाढीले गर्दा मोरङको सुन्दरहरैँचा र सुनवर्षी, रंगेली, बेलबारी, रतुवामाई नगरपालिका अनि केराबारी, कटहरी, जहदा, ग्रामथान, धनपालथान र बुढीगंगालगायत गाउँपालिकाका बासिन्दा प्रभावित भएका छन् ।अविरल वर्षाले गर्दा मोरङमा मंगलबार एकजनाको मृत्यु भएको थियो । एउटा खोलाको निर्माणाधीन पुल भत्किएको थियो ।
