- वि.सं २o७९ जेठ १७ मंगलबार
बजेटको समीक्षा
एकीकृत समाजवादीका अध्यक्ष माधवकुमार नेपालले बजेट कार्यान्वयनमा समस्या देखिन सक्ने बताएका छन् । सिंहदरबारमा सोमबार बसेको संसदीय दलको बैठकलाई सम्बोधन गर्दै नेपालले आर्थिक वर्षको बजेटमा धेरै राम्रा कुरा आए पनि कार्यान्वयनमा समस्या आउन सक्ने बताए । उनले विगतदेखि देखिँदै आएको कार्यान्वयनको समस्यालाई ध्यान दिएर अगाडि बढ्नुपर्नेमा जोड दिए ।
‘योजनाहरू बडो राम्रा देखिन्छन् । तर, कार्यान्वयनको पक्ष फितलो छ । अब योजनाको पाटोमा कुरा गर्दा हाम्रो संरचनाले त्यसलाई साथ दिन्छ कि दिँदैन ? संरचनाहरू चुस्त, दुरुस्त छन् कि छैनन् ?’ नेपालले भने, ‘लेखिएको कुरा मात्रै कागजमा सीमित हुने हो कि व्यवहारमा लागू हुने हो भन्ने पक्षमा हाम्रो बढ्ता चिन्ता छ । कार्यान्वयन नै अहिलेसम्म एउटा महत्वपूर्ण समस्याको रूपमा रहेको छ ।’ बैठकमा अध्यक्ष नेपालले बजेट राम्रोसँग अध्ययन गरेर संसद्मा प्रस्तुत हुन सांसदहरूलाई निर्देशन दिएको प्रमुख सचेतक जीवनराम श्रेष्ठले जानकारी दिए ।
नेता झलनाथ खनालले बजेटको कमीकमजोरीलाई हटाएर अझ समृद्ध बनाएर लागू गर्नुपर्नेमा जोड दिए । ‘बैठकमा हामीले बजेटको बारेमा छलफल गर्यौँ । कतिपय राम्रा कुराहरू आएका छन् । तर, हामी समाजवादको लक्ष्यतर्फ जाने हिसाबले अझै कैयौँ कुरामा कमीकमजोरी पनि छन् । ती कमीकमजोरीलाई हटाएर यो बजेटलाई अझै समृद्ध बनाएर लागू गर्यो भने राम्रो हुन्छ भन्ने निष्कर्ष निकालेका छौँ,’ खनालले भने ।
