- वि.सं २o८१ बैशाख २३ आइतबार
जुम्लाको एक मात्र चन्दननाथ नगरपालिकाको मेयरमा स्वतन्त्र उम्मेदवार राजुसिंह कठायत निर्वाचित भएका छन् । उनी दुई हजार चार सय तीन मतसहित चन्दननाथको मेयर पदमा निर्वाचित भएका हुन् ।
उनका प्रतिद्वन्द्वी कांग्रेसका पदमबहादुर शाहीले दुई हजार तीन सय ४१ मत प्राप्त गरेको मुख्य निर्वाचन अधिकृतको कार्यालय जुम्लाका सहायक अधिकृत तोयानाथ उपाध्यायले बताए । यस्तै, कांग्रेसकी रामदेवी खड्का दुई हजार आठ सय आठ मत प्राप्त गर्दै उपमेयरमा विजयी भएकी छिन् ।
चन्दननाथको मेयरमा निर्वाचित कठायत कांग्रेसले टिकट नदिएपछि स्वतन्त्र उम्मेदवार बनेका थिए । यहाँको सदरमुकाम खलंगा चन्दननाथ नगरपालिकामा सबै ठूला राजनीतिक दलहरूको आँखा गड्ने गरेकाे छ । तर, ठूला राजनीतिक दलहरूलाई पछि पार्दै स्वतन्त्र उम्मेदवार कठायत मेयर पदमा विजयी भएका हुन् ।
