- वि.सं २o७८ चैत ११ शुक्रबार
निजी तथा आवासीय विद्यालय अर्गनाइजेसन नेपाल (प्याब्सन)को अध्यक्षमा डिके ढुंगाना चयन भएका छन् । बुधबार र बिहीबार भएको १५औँ राष्ट्रिय महाधिवेशनबाट ढुंगानाको अध्यक्षतामा २५ उपाध्यक्षसहित ८९ सदस्यीय कार्यसमिति चयन भएको हो । महासचिवमा आरबी कटवाल र कोषाध्यक्षमा सन्तोषमणि न्यौपाने निर्वाचित भएका छन् ।
ढुंगानाले शिक्षा क्षेत्रको विकासका लागि नीतिगत सवालमा लबिङ गर्ने बताए । अब संघीय ऐन आउन लागेको र त्यसमा निजी क्षेत्रको भूमिकाका लागि पहल गर्ने उनको भनाइ छ । शिक्षकको वृत्तिविकास, कक्षाकोठा राम्रो बनाउने, विश्व बजारमा बिक्ने जनशक्ति उत्पादन गर्ने गरी शैक्षिक विकासका कार्यक्रम ल्याउने ढुंगानाले बताए ।
महाधिवेशनबाट आगामी तीनवर्षे कार्यकालका लागि २७ पदाधिकारी र ३९ जना सदस्य रहने गरी ६६ जनाको कार्यसमिति चयन गर्ने बताइए पनि सर्वसम्मतिका लागि संख्या बढाएर ८९ सदस्यीय पुगेको छ । पाँच हजार साधारण सदस्य विद्यालय रहेको प्याब्सन महाधिवेशनमा देशभरबाट दुई हजार दुई सय ४६ प्रतिनिधि सहभागी भएका थिए ।
