एमसिसीले नयाँ बानेश्वर दिनभर तनावग्रस्त 

प्रदर्शनकारीमाथि एक सय ६३ सेल अश्रुग्यास प्रहार

अमेरिकी सहयोग परियोजना मिलेनियम च्यालेन्ज कर्पोरेसन (एमसिसी)विरुद्धको बिहीबार हुने भनिएको विरोध प्रदर्शन अनियन्त्रित बन्ने सूचना प्रहरीले बुधबार नै पाएको थियो । त्यसलगत्तै प्रहरीले नयाँ बानेश्वरस्थित संघीय संसद् भवनवरिपरि काँडेतारको घेरा लगायो ।

एसपी दिनेश मैनाली प्रवक्ता, काठमाडौं परिसर

बिहीबार एक सय ६३ सेल अश्रुग्यास प्रहार भएका छन् । तर, रबरको बुलेट भने प्रहार भएन । प्रदर्शनकारीको तुलनामा प्रहरी संयमित नै थियो ।

बिहीबार बिहानैदेखि प्रहरीको गस्तीका साथै तैनाथ गरियो । माइतीघर मण्डलाबाट नयाँबानेश्वरतर्फ जाने सडक फलामे छेकबारले बन्द थिए । सवारीसाधन प्रवेशलाई पूर्ण बन्द गरिएको थियो । सडकभरि नेपाल प्रहरी र सशस्त्र प्रहरीका सुरक्षाकर्मीको बाक्लो उपस्थिति देखिन्थ्यो । 

बिजुलीबजार पुलआसपासका क्षेत्रमा पनि सुरक्षाकर्मीको बाक्लो तैनाथी देखिन्थ्यो । यहीक्रममा बुद्धनगर र अनामनगरतर्फबाट एमसिसीको विरोध गर्दै आन्दोलनकारी सडकमा देखिए । प्रहरीले लाठीचार्ज गरेर आन्दोलनकारीलाई तितरबितर पार्‍यो । आन्दोलकारीमध्ये कोही बुद्धनगरतर्फ त कोही अनामनगरतर्फ लागे । 

प्रहरीले संसद् भवनतिर अघि बढ्न नदिएपछि आक्रोशित आन्दोलनकारी ढुंगामुढामा उत्रिए । केहीबेरको हानाहानपछि प्रहरीले आन्दोलनकारीतर्फ अश्रुग्यास प्रहार गर्न थाल्यो । धुवाउँदै गरेको सेल समातेर आन्दोलनकारी उल्टै प्रहरीतर्फ फर्काउँदै थिए । बुद्धनगरतर्फको आन्दोलनमा सहभागी डडेल्धुरा नवदुर्गा गाउँपालिका–५ गजेलाका २९ वर्षीय हेमराज अवस्थी यही क्रममा सडकमा ढले । उनको टाउकोबाट रगत बगिरहेको थियो । प्रहरीको टोली आएर उनलाई उपचारका लागि अस्पताल लग्यो । 

आन्दोलनकारीको दबाब प्रहरीले शंखमूल र पुरानो बानेश्वरतर्फबाट पनि झेलिरहेको थियो । संसद् भवनतर्फ जान खोज्ने उनीहरूलाई प्रहरीले फलामे छेकबार लगाएर रोकिरहेको देखिन्थ्यो । एभरेस्ट होटेलसामुन्नेको सडकमा पानीको फोहोरा प्रहार गर्ने टैंक तैनाथ थिए । त्यसअघि पुनः प्रहरीको फलामे छेकबार खडा थियो । 

उता, यातायात व्यवस्था विभागको ठीक अघितर्फको सडकमा भने नेपाल मजदुर किसान पार्टीका कार्यकर्ता एमसिसीको विरोधमा नारा लगाइरहेका देखिन्थे । प्रहरीले त्यस क्षेत्रमा पनि ठाउँ–ठाउँमा फलामे छेकबार लाएको देखिन्थ्यो । सडकमा यातायातका साधन आउजाउमा पूर्ण प्रतिबन्ध गरिएको थियो । सबैभन्दा धेरै प्रहरीको उपस्थिति संसद् भवनको पश्चिम गेटतर्फ देखिन्थ्यो । आन्दोलनकारी प्रवेशमा यसतर्फ पूर्ण प्रतिबन्ध गरिएको थियो । आसपासका क्षेत्रमा सशस्त्र प्रहरीका सुरक्षाकर्मीको बाक्लो पहरा थियो । प्रत्येक गौँडामा नेपाल प्रहरी र सशस्त्र प्रहरी तैनाथ देखिन्थे । मीनभवन कलेज, शान्तिनगर, अनामनगरतर्फ जाने सडकको मुखमा पनि प्रहरीको बाक्लो उपस्थिति देखिन्थ्यो । 

प्रदर्शनकारी संसद् भवनतर्फ अघि बढ्न थालेपछि लाठीचार्ज

बिजुलीबजारबाट आएका आन्दोलनकारी प्रहरीको सुरक्षा घेरा तोडेर संसद् भवनतर्फ अघि बढ्न थालेपछि प्रहरी लाठीचार्जमा उत्रिएको थियो । आक्रोशित आन्दोलनकारी त्यसपछि प्रहरीतर्फ ढुंगा प्रहारमा उत्रिएका थिए । अवस्था अनियन्त्रित बन्न पुगेपछि प्रहरीले आन्दोलनकारीतर्फ अश्रुग्यास प्रहार गरेको थियो । प्रहरीले १२ जना प्रदर्शनकारीलाई पक्राउ गरेको छ ।

आन्दोलनमा सहभागी अखिल क्रान्तिकारीका केन्द्रीय सदस्य खगेन्द्र रावलले प्रहरीबाट आन्दोलनकारीमाथि दमन भएको बताए । ‘हामी एमसिसीको विरोधमा सडकमा थियौँ । प्रहरीले हामीमाथि अचानक लाठी प्रहार गर्‍यो । लगत्तै अश्रुग्यास प्रहार गर्‍यो । हाम्रा साथीहरू घाइते भएका छन् । प्रहरीबाट हामीमाथि दमन भएको छ,’ उनले भने ।

काठमाडौं परिसरका प्रवक्ता एसपी दिनेश मैनालीका अनुसार बिहीबार एक सय ६३ सेल अश्रुग्यास प्रहार भएका छन् । तर, रबरका गोली भने बिहीबार प्रयोग नगरिएको उनले बताए । ‘बिहीबार अश्रुग्यास प्रयोग भए पनि रबरको बुलेट भने प्रहार भएन । प्रदर्शनकारीको तुलनामा प्रहरी संयमित नै थियो,’ उनले भने ।

टाउकोमा चोट लागेर सडकमै ढले अवस्थी

घाइते हेमराज अवस्थी 

एमसिसी खारेजीको माग गर्दै आन्दोलनमा उत्रिएका डडेल्धुराका २९ वर्षीय हेमराज अवस्थीको अवस्था चिन्ताजनक छ । उनको माइतीघरस्थित अन्नपूर्ण न्युरो अस्पतालमा उपचार भइरहेको छ । माओवादी केन्द्रका नेता खगराज भट्टले प्रहरीले हानेको रबरको बुलेट लागेपछि अवस्थी घाइते भएको बताए । टाउकोमा चोट लागेका कारण सडकमै ढलेका उनलाई उपचारका लागि प्रहरीले नयाँबानेश्वरस्थित एभरेस्ट अस्पताल लगेको थियो । त्यहाँ उपचार हुन नसकेपछि राष्ट्रिय ट्रमा सेन्टर लगियो । त्यहाँ पनि उपचार हुन सकेपछि उनलाई अन्नपूर्ण न्युरो भर्ना गरिएको भट्टले बताए । ‘एमसिसीको विरोध गर्न उनी प्रदर्शनमा सहभागी भएका रहेछन् । यहीक्रममा रबरको गोली उनको टाउकोमा लागेको सूचना छ । उनको अवस्था चिन्ताजनक छ । टाउकोमा रगत जमेको चिकित्सकले भनेका छन्,’ उनले भने ।

टीकाथली बस्दै आएका अवस्थी साथीहरूसँगै एमसिसीको विरोध गर्न बिजुलीबजार पुगेका थिए । प्रहरीले आन्दोलन रोक्न खोजेपछि उनीहरूले प्रहरीतर्फ ढुंगा प्रहार गरेका थिए । स्थिति नियन्त्रणभन्दा बाहिर जान थालेपछि प्रहरीले आन्दोलनकारीतर्फ अश्रुग्यास प्रहार गरेको थियो । अवस्थीको टाउकोमा अश्रुग्यासको सेल लागेको आन्दोलनमा सहभागी सरोज कार्कीले बताए । ‘बिजुलीबजारको पुलमा दुई पक्षबीच ठेलमठेल चल्यो । यहीक्रममा प्रहरीले आन्दोलनकारीलाई बुद्धनगरतर्फ धपायो । आक्रोशित आन्दोलनकारीले प्रहरीतर्फ ढुंगा हान्न थाले । प्रहरीले अश्रुग्यास बर्सायो । यहीक्रममा एकजना सडकमै ढले । उनको टाउकोबाट रगत बगिरहेको थियो । अश्रुग्यासको सेल लागेर यस्तो भएको हो कि जस्तो लाग्छ,’ उनले भने ।

महानगरीय प्रहरी परिसर काठमाडौंका प्रवक्ता एसपी दिनेश मैनालीले घाइते अवस्थीको उपचार अन्नपूर्ण न्युरोमा भइरहेको बताए । ‘झडपकै क्रममा एकजना सडकमा बेहोस अवस्थामा भेटिए । उनको टाउकोमा चोट रहेछ । चोट कसरी लाग्न पुग्यो ? यस सम्बन्धमा अनुसन्धान हुँदै छ । उनको उपचारमा कुनै कसर बाँकी नराख्न हामीले अस्पताललाई भनेका छौँ,’ उनले भने ।