ठेकेदारले सडक निर्माणमा बदमासी गर्दा उठेन काठमाडौंको फोहोर

ठेकेदारले दुई वर्षमा कालोपत्रे गर्नुपर्ने सडक आठ वर्षसम्म पनि अलपत्र पारेपछि काठमाडौं उपत्यकाको फोहोर व्यवस्थापनमा असर परेको छ । ११ दिनदेखि काठमाडौंका सडक, गल्ली र चोकहरूमा फोहोर थुप्रिएर दुर्गन्ध फैलिनुको एक मात्र कारण पासाङ ल्हामु राजमार्गमा शैलुङ कन्स्ट्रक्सनले  गरेको बदमासी हो ।

उपत्यकाको फोहोर नुवाकोटको ककनी गाउँपालिका–२, सिसडोल पुर्‍याउन यही राजमार्ग प्रयोग गर्नुपर्छ । तर, शैलुङले दुई वर्षभित्र निर्माण सक्ने गरी ५ जेठ ०७१ मा सम्झौता गरेकोमा अहिलेसम्म ५० प्रतिशत पनि काम गरेको छैन । ठेकेदारको बदमासीविरुद्ध १ फागुनदेखि आन्दोलनमा उत्रिएका स्थानीयले सडक अवरुद्ध गरेका छन् । जसकारण काठमाडौंको फोहोर उठ्न सकेको छैन ।

‘सडक कालोपत्रे हुनुपर्‍यो भन्ने त्यहाँका स्थानीयको एकसूत्रीय माग छ । माग सम्बोधन होस् भनेर सडक विभागलाई पत्राचार गर्‍यौँ । विभाग र निर्माण कम्पनीसँग आज पनि छलफल राख्यौँ । तर, कालोपत्रे नभएसम्म बाटो नखुलाउने स्थानीयको अडान छ,’ काठमाडौं महानगरपालिकाअन्तर्गत वातावरण विभाग प्रमुख सरिता राईले भनिन् । 

काठमाडौं र ललितपुर महानगरसहित १८ वटै पालिकाको फोहोर सिसडोलमा व्यवस्थापन गरिँदै आएको छ । काठमाडौं महानगरका अनुसार एकै दिन हजारदेखि १२ सय टनसम्म फोहोर उत्पादन हुन्छ । १० दिनमा करिब १५ सय ट्रक फोहोर थुप्रिसकेको र महानगरले जथाभावी सडकमा नफाली घरमै जम्मा गर्न आग्रह गरेको राईले बताइन् ।

 कालोपत्रे नसकेसम्म सडक नखोल्ने स्थानीयको अडान
निर्माण कम्पनीले सोमबारदेखि काम थाले पनि कालोपत्रे नसकेसम्म सडक नखोल्ने अडान स्थानीयले राखेको सडक विभागले जनाएको छ । ‘ठेकेदार कम्पनीले सोमबारदेखि काम गर्न त थालेको छ । समयमै काम सकाउने प्रतिबद्धता पनि गरेको छ । तर, स्थानीय सडक कालोपत्रे नभई बाटो खुलाउन तयार छैनन्,’ विभागका प्रवक्ता शिवप्रसाद नेपालले भने, ‘भरपर्दो ठेकेदार कम्पनी होइन । त्यसैले कहिलेदेखि बाटो खुल्ला भन्न गाह्रो छ ।’ 

भारतीय एक्जिम बैंकको ऋण सहयोगमा बनिरहेको यो सडकमा शैलुङ र भारतको अरावली इनफा पावर प्रालि जेभीले ठेक्का पारेका थिए । उनीहरूले दुई खण्डमा विभाजन गरेर सडकमा काम थालेका थिए । एउटा खण्डमा भारतीय निर्माण कम्पनीसँग भएको ठेक्का सम्झौता विभागले तोडिसकेको छ । त्यसविरुद्ध ठेकेदार कम्पनी न्यायिक पुनरावलोकनमा गएकाले अर्को ठेक्का लागेको छैन । तर, शैलुङको मनपरीमा विभागले कारबाही चलाएको छैन । यसबारे विभागका प्रवक्ता नेपाल भन्छन्, ‘ठेक्का तोड्दा आयोजना झन् अलपत्र पर्न सक्छ । त्यसैले ठेकेदार कम्पनीलाई ताकेता गर्न र छिटो काम गर्नका लागि भन्नेबाहेक हामीसँग अरू विकल्प पनि छैन ।’ यसअघि २८ मंसिरदेखि पनि स्थानीयले दुई सातासम्म सडक अवरुद्ध गरेका थिए । त्यतिवेला थुप्रिएको फोहोर व्यवस्थापन गर्न महानगरलाई दुई साता नै लागेको थियो ।