गोल्डेनगेट क्वार्टरफाइनलमा

गोल्डेनगेट लामा टेन्डी शेर्पा स्मृति खुला बास्केटबल प्रतियोगिताको पुरुषमा बिहीबार क्वार्टरफाइनलमा प्रवेश गरेको छ । तीन टोली रहेको समूह डीको लिग खेलमा गोल्डेनगेटले क्याम्पियन सोलोलाई ७७–६३ ले पराजित गर्दै समूह विजेता बन्यो । गोल्डेनगेटका कर्मा गुरुङले २७ स्कोर गरे । क्याम्पियनका मनीष राजोपाध्यायले १७ स्कोर गरे । लिगको आफ्नो पहिलो खेलमा गोल्डेनगेटले एसिसिएसलाई हराएको थियो ।

पहिलो क्वार्टरमा १६–१४ को अग्रता लिएको गोल्डेनगेट दोस्रोमा १३–१४ ले पछि पर्‍यो । बाँकी क्वार्टरको नतिजा आफ्नो पक्षमा पारेको गोल्डेनगेटले १६–१२ र ३२–२३ स्कोर गरेको थियो । प्रतियोगितामा रोयल बास्केटबल एकेडेमीले दोहोरो जित निकाल्यो ।

महिलाको प्रतिस्पर्धात्मक भिडन्तमा रोयलले नेपाल प्रहरी क्लबलाई ५१–५० को साँघुरो अन्तरले हरायो । रोयलकी छिरिङ शेर्पाले २४ स्कोर गर्दा प्रहरीकी रोशनी श्रेष्ठले १५ स्कोर गरिन् । तेस्रो क्वार्टर सकिँदासम्म प्रहरी ३५–३३ ले अगाडि थियो । अन्तिम तथा चौथो क्वार्टरमा रोयलले १८–१५ स्कोर गर्दै समग्रमा खेल एक स्कोरले जित्यो । यसअघि रोयल सुरुका दुई क्वार्टरमा ६–११ र ९–१० ले पछि थियो ।

पुरुषमा रोयलले जेभियर इन्टरनेसनल कलेजलाई ९८–६७ ले पन्छायो । रोयलका विकास गुरुङले २२ तथा जेभियरका अनिश मगरले १५ स्कोर गरेका थिए । सबै क्वार्टरमा अग्रता बनाएको रोयलले १५–१४, २७–२१, २८–२० र २८–१२ स्कोर गर्‍यो ।