- वि.सं २o७८ माघ १८ मंगलबार
पूर्वी नवलपरासीमा एक अटोचालकको शंकास्पद मृत्यु भएको छ। ना.२ह ६१७३ नम्बरको अटोचालक कावासोती– १३ गैरी नयाँ बस्तीका ५२ वर्षीय माधवप्रसाद गिरीकाे शंकास्पद मृत्यु भएको हो।
सोमबार राति बेपत्ता भएका गिरीको शव आज बिहान साढे ८ बजेतिर बौनाहाको सिलहट घोलमा पानीको दलदलमा गाडेको अवस्थामा फेला पारेको थियो। शव देखेपछि स्थानीयले प्रहरीलाई खबर गरेका थिए। मृतकको अनुहारमा चोट लागेको छ भने अटो घटनास्थलदेखि केही पर बाटोमा भेटिएको छ। घटनास्थल वरपर सिक्री, दुई थान मोबाइल र जुत्ता फेला परेको छ।
जिल्ला प्रहरी कार्यालय नवलपुरका प्रहरी उपरीक्षक प्रज्ज्वल महर्जनले घटना शंकास्पद भएको र घटनाको अनुसन्धान भइरहेको बताए। प्रारम्भिक अनुसन्धानअनुसार उनको हत्या भएको अनुमान गरिएको छ। अहिले घटनास्थललाई प्रहरीले नियन्त्रणमा लिएर अनुसन्धान गरिरहेको छ।
