पोखरामा कोभिड– १९ विरुद्धको खोप लगाउनेहरूको भिड बढेको छ ।
सरकारले माघ ७ गतेदेखि सार्वजनिक सेवा प्रवाहमा खोप कार्ड अनिवार्य गरेसँगै कोभिड– १९ विरुद्धको खोप लगाउनेको भिड बढेको हो । पोखरामा विभिन्न केन्द्रहरूमार्फत खोप अभियान सञ्चालन भइरहेको छ । पोखरा महानगरपालिका– ५ स्थित खोप केन्द्रका प्रमुख आशिष सुवेदीले खोप लगाउनेहरूको भिड दैनिक एक हजार पाँच सयभन्दा बढी रहेको बताए । हालसम्म कुनै पनि खोप नलगाएकाहरूलाई जोन्सन एन्ड जोन्सन खोप दिइएको तथा पहिलो डोज लगाइसकेकाहरूलाई कोभिसिल्ड वा भेरोसेल कुन खोप लगाएको हो सो खोपको दोस्रो मात्रा दिइएको उनले बताए । खोप केन्द्रमा पुरुषभन्दा महिला बढी संख्यामा खोप लगाउन आएका पनि उनले बताए ।
पहिले खोप लगाउन आग्रह गर्दा पनि अस्वीकार गर्नेहरू अहिले खोप लगाउन आउने गरेको उनको भनाइ छ । जनस्वास्थ्यको मापदण्ड तथा भौतिक दूरीसमेत कायम गर्न नसकिने गरी खोप लगाउनेको भिड बढेको उनले बताए ।