नेकपा एमाले कञ्चनपुरको नेतृत्व चयनका लागि मतदान सुरु भएको छ। २३ पुस (शुक्रबार)देखि एमाले कञ्चनपुरको नयाँ नेतृत्वका लागि ८औँ अधिवेशन सुरु भएको थियो । सहमति नभएपछि चुनावी प्रक्रियाबाट नेतृत्व छनाेट गर्न लागेको हो ।

सहमतिका लागि पाँच दिन नेताहरूबीच रस्साकस्सी चले पनि अन्तत: पाँच दिनपछि चुनावी प्रक्रियामा जानुपर्ने बाध्यता आएको छ । मंगलबार साँझ ५ बजेदेखि मतदान सुरु भएको निर्वाचन समितिले जनाएको छ ।

एमाले कञ्चनपुरको अध्यक्षमा सुरेन्द्र विष्ट र वीरबहादुर थापा (पातल) बीच टक्कर हुनेछ । एमाले तत्कालीन सचिवसमेत रहेका विष्टले जिल्ला सदस्य, उपसचिव हुँदै सचिवको यात्रा तय गरेका हुन् भने थापा एमाले–माओवादी एकीकरण भई नेकपा हुँदा माओवादीबाट आएका थिए । थापा ०५ पुस ०७६देखि ओली समूहमै बसेर एमालेतिरै गएका थिए ।

थापा प्यानलबाट उपाध्यक्ष महेश पन्त, सचिव अशोककुमार चन्द, उपसचिव शेरबहादुर चन्द र ईश्वरा कुँवरले उम्मेदवारी दिएका छन् । उपसचिवमा कुँवरले दिएको उम्मेदवारी रद्द भएको छ । उनको मापदण्ड नपुगेपछि कुँवरको उम्मेदवारी रद्द भएको निर्वाचन समितिले जनाएको छ । 

एमाले पदाधिकारीका लागि दुई कार्य समितिमा बस्नुपर्ने भए पनि कुँवर ०७४ मा नेकपा हुुँदा एमालेबाट जिल्ला सदस्य आएका थिइन् । विष्ट प्यानलबाट उपाध्यक्ष लक्ष्मी बुढा, सचिव पल्लवराज भट्ट, उपसचिव कर्णबहादुर चन्द, फैरु तामाङको उम्मेदवारी दर्ता भएको छ । एमाले कञ्चनपुरको एक सय १५ सदस्यका लागि दुई सय १९ ले उम्मेदवारी दर्ता गराएका थिए । एमाले कञ्चनपुरको नेतृत्व छनोटका लागि चार सय ९९ ले मतदान गर्नेछन् ।