नागढुंगा सुरुङमार्गको भौतिक प्रगति अपेक्षितभन्दा न्यून, २५ प्रतिशत भौतिक प्रगति

निर्माणाधीन नागढुंगा सुरुङमार्ग निर्माणको भौतिक प्रगति २५ प्रतिशत पुगेको छ । यसअघि २५ असोजमा भौतिक प्रगति २३ प्रतिशत थियो । आयोजना कार्यालयले प्रत्येक हप्ता ४ प्रतिशतका दरमा भौतिक प्रगति हुने जानकारी गराएको थियो । तर, चाडपर्वमा आठ दिन बिदा र आयोजनास्थलमा भएको दुर्घटनाबाट मजदुरको ज्यान जाँदा १४ दिन काम बन्द हुँदा अपेक्षाकृत प्रगति नभएको नागढुंगा सुरुङमार्ग निर्माण आयोजना प्रमुख नरेशमान शाक्यले जानकारी दिए । ‘अब फेरि आयोजना निर्माणको कामलाई गति दिइसकेका छौँ,’ उनले भने । 

आयोजना कार्यालयले मुख्य सुरुङ ०७९ साउनसम्ममा छेडिने (ब्रेक थ्रू) जानकारी दिएको छ । त्यसअघि ०७८ चैतभित्रमा अडिट टनेलहरू निर्माण सक्ने कार्ययोजना रहेको छ । अडिट र मुख्य गरी कुल पाँच हजार चार सय ९९ मिटर लम्बाइ सुरुङ खन्नुपर्नेछ । ‘त्यसमध्ये १७ मंसिरसम्ममा एक हजार आठ सय ८८ मिटर खनिसकिएको छ,’ आयोजना प्रमुख शाक्यले भने । 

आयोजनामा मुख्य सुरुङको लम्बाइ दुई हजार ६ सय ८८ मिटर रहेको छ । त्यसमध्ये अहिलेसम्म पाँच सय ९९ मिटर सम्पन्न भएको छ । इभ्याकुएसन सुरुङ एक हजार एक सय २१, वर्किङ अडिट एक सय २६ र क्रस प्यासेज ४२ सम्पन्न भइसकेको छ । कुल इभ्याकुएसन, वर्किङ र क्रस प्याकेज क्रमशः दुई हजार पाँच सय ५७ मिटर, एक सय २६ मिटर र एक सय २८ मिटर रहेको छ । ‘खनिएको कुल लम्बाइमध्ये काठमाडाैंतर्फ एक हजार नौ मिटर र धादिङतर्फ आठ सय ७९ मिटर सम्पन्न भएकोे छ,’ आयोजना प्रमुख शाक्यले भने । 

आयोजनाको कुल लागत २२ अर्ब रुपैयाँ पुग्ने अनुमान छ । थालनीमा २० अर्ब ६० करोड रुपैयाँ हुने अनुमान थियो । तर, जापानिज येन बलियो भएका कारण बढेर २२ अर्ब १४ करोड रुपैयाँ पुगेको हो । त्यसमध्ये जाइकाले सुरुङ निर्माणमा १६ अर्ब ६३ करोड रुपैयाँ सहुलियत ऋण उपलब्ध गराउनेछ । 

यसबाहेक संरचना निर्माणतर्फ एउटा अन्डरपास सम्पन्न भइसकेको छ । आयोजनाले कुल दुईवटा अन्डरपास बनाउने योजना छ । त्यस्तै, चारवटा बक्स कल्भर्टमध्ये तीनवटा, ओभर पास एउटा निर्माण सम्पन्न भइसकेको जानकारी दिएको छ । त्यस्तै, तीनवटा पुल निर्माणमध्ये दुईवटा सकिएका छन् भने फ्लाइओभर निर्माणका लागि जग्गा प्राप्तिको काम भइरहेको आयोजना कार्यालयले जानकारी दिएको छ । कुल ११ वटा संरचना निर्माण गर्नुपर्नेमा अहिलेसम्म सातवटा सम्पन्न भइसकेका छन् । 

नागढुंगा सुरुङ ०७७ पुसदेखि औपचारिक निर्माण थालिएको आयोजनाको मोबिलाइजेसन पेस्कीसमेत गरेर ३३ प्रतिशत आर्थिक प्रगति भएको छ । आयोजनामा २६ जनाको उच्च व्यवस्थापन नेतृत्वमा जापानिज रहेका छन् भने करिब ५० जना नेपाली इन्जिनियर संलग्न छन् । कुल कामदार संख्या ६ सयको  हाराहारीमा भएको आयोजना कार्यालयले जानकारी दिएको छ । आयोजना अप्रिल २०२३ मा सम्पन्न गर्ने ठेक्का सम्झौता छ । 

आयोजनाको कुल लागत २२ अर्ब रुपैयाँ पुग्ने अनुमान छ । थालनीमा २० अर्ब ६० करोड रुपैयाँ हुने अनुमान थियो । तर, जापानिज येन बलियो भएका कारण बढेर २२ अर्ब १४ करोड रुपैयाँ पुगेको हो । त्यसमध्ये जाइकाले सुरुङ निर्माणमा १६ अर्ब ६३ करोड रुपैयाँ सहुलियत ऋण उपलब्ध गराउनेछ । बाँकी पाँच अर्ब ८५ करोड रुपैयाँ भने नेपाल सरकारको हुनेछ । नेपाल सरकारले उपलब्ध गराउने रकम जग्गाको मुआब्जा, संरचना र अन्य प्रशासनिक काममा खर्च हुनेछ । कोभिड–१९ ले गर्दा कार्ययोजनाअनुसार काम नभए पनि गति बढाएर समयमै सक्ने प्रयास भइरहेको आयोजना व्यवस्थापनले जानकारी दिएको छ । आयोजनाका प्राविधिकहरूका अनुसार पूर्व (काठमाडौंतर्फ) र पश्चिम (धादिङतर्फ) दुवैतर्फ  सुरुङ खन्ने कामलाई गति दिइएको छ ।