कतारमाथि नेपाली महिला टोलीको सानदार जित

बलिङ र ब्याटिङमा उत्कृष्ट प्रदर्शन गर्दै नेपाली महिला क्रिकेट टोलीले कतारमाथि पहिलो अन्तर्राष्ट्रिय टी–२० क्रिकेट प्रतियोगितामा एक सय १९ रनको कीर्तिमानी जित निकालेको छ । कतारको दोहामा मंगलबार भएको खेलमा नेपाली महिला टोलीले अन्तर्राष्ट्रिय क्रिकेटमा पहिलोपटक फरकिलो जित निकालेको हो । नेपालले यसअघि सन् २०१९ मा इन्डोनेसियालाई ९२ रनले हराएको थियो । जितसँगै नेपालले कतारविरुद्धको सिरिजमा १–० को अग्रता लिएको छ । 

नेपाली महिला टोलीले सन् २०१९ सम्पन्न १३औँ दक्षिण एसियाली खेलकुद प्रतियोगितापछि पहिलोपटक अन्तर्राष्ट्रिय खेल खेलेको हो । घरेलु क्रिकेटको कमजोर संरचना तथा कोभिड– १९ का कारण महिला क्रिकेटर करिब दुई वर्ष अन्तर्राष्ट्रिय खेलविहीन भएका थिए । कतारको दोहामा टस हारी पहिलो ब्याटिङ गरेको नेपालले निर्धारित २० ओभरमा चार विकेटको क्षतिमा एक सय ४६ रनको मजबुत योगफल खडा गर्‍यो । प्रत्युत्तरमा कतार ११.५ ओभरमा केवल २७ रनमै समेटियो । 

६ ब्याट्सम्यान डकआउट
नेपाली खेलाडीको घातक बलिङसामु कतारका कुनै पनि खेलाडी क्रिजमा लामो समय टिक्न सकेनन् । कविता कुँवर, सीता रानामगर, करुणा भण्डारी तथा रुविना क्षेत्रीले आफ्नो स्पेलमा विकेट लिँदा कतारका ब्याट्सम्यान कमजोर देखिए । कतारका सात ब्याट्सम्यानले खाता नै खोल्न सकेनन् । जसमध्ये सविजा पानायाम मात्र शून्य रनमा नटआउट भइन् । ओपनर साची र अलिना खान सामना गरेको बलमै आउट भए । यसैगरी साश्रीनवाव र ऐसा रहमानले समान दुई बल सामना गरी विकेट गुमाए ।

इनिङ्सको ११औँ ओभरमा नेपालबाट रुविनाले बलिङ गरेकी थिइन् । उनले पाँच बलको अन्तरमा कतारका तीन ब्याट्सम्यानलाई पेभेलियनको बाटो देखाइन् । रुविनाले ११.१, ११.३ र ११.५ ओभरमा विकेट हात पार्दा कतार केवल २७ रनमै समेटियो । उनले १.५ ओभरमा बलिङ गर्दै एक रन मात्र खर्चदै सर्वाधिक तीन विकेट हात पारिन् । 

जोशी र राईको अन्तर्राष्ट्रिय डेब्यु
कतारविरुद्ध नेपालका दुई खेलाडीले अन्तर्राष्ट्रिय टी–२० खेलमा डेब्यू गरेका छन् । कविता जोशी र संगीता राईले डेब्यू अवसर पाएका हुन् । डेब्यू गरेकी संगीताले एक ओभर बलिङको अवसर पाउँदा दश रन खर्चिन् । कतारबाट चार खेलाडीले नेपालविरुद्ध डेब्यू गरेका थिए । 

इन्दुको अर्धशतकीय इनिङ्स
पहिलो ब्याटिङ गरेको नेपालका लागि तेस्रो क्रमका ब्याट्सम्यान इन्दु बर्माले अर्धशतकीय इनिङ्स खेलिन् । नेपालले १.५ ओभरमा ओपनर काजल श्रेष्ठ (३) गुमाएको थियो । काजलको विकेट पतन हुँदा नेपालले स्कोर बोर्डमा आठ रन मात्र जोडेको थियो । त्यसपछि सीता रानामगर र इन्दुबीच दोस्रो विकेटका लागि ८८ रनको साझेदारी हुँदा नेपाल ११.४ ओभरमा ९६–२ को बलियो अवस्थामा पुग्यो । छक्का प्रहार गर्ने चक्करमा सीता स्टम्पिङ भइन् । उनले ३३ बलमा पाँच चौकाको सहयोगमा ३९ रन जोडिन् । 

सीता आउट भएकै ओभरमा कप्तान रुविना पनि पेभेलियन फर्किइन् । ११.६ ओभरमा रुविना हिरल अग्रवालबाट रन आउट भइन् । त्यसपछि सरिता मगरले २१ बलमा दुई चौकाको सहयोगमा २१ रन बनाइन् । कविताले १२ बलमा आठ रनको योगदान दिइन् । अर्धशतकीय इनिङ्स खेलेकी इन्दु रिटायर्ड हर्ट भइन् । म्यान अफ दी म्याच इन्दुले ४७ बल खेल्दै ५५ रनको योगदान दिइन् । महिला क्रिकेटमा इन्दु टी–२० मा अर्धशतक बनाउने पहिलो खेलाडी हुन् । कतारले २० अतिरिक्त रन दिएको थियो । 

 दुईजनाले मात्र बनाए आठ रन
नेपाली बलरको सटिक र घातक बलिङ सामना गर्न नसकेको कतारको ब्याटिङ इनिङ्समा दुई ब्याट्सम्यानले मात्र समान सर्वाधिक आठ रन बनाएका थिए । सातौँ क्रमका खादिला इम्तियाज र आठौँ क्रमका एन्जेलिन मारेले ८–८ रन बनाए । खादिलाले १६ बलमा एक चौका प्रहार गरिन् । मारेले १३ बलमा एक चौका ठोकिन् । सो इनिङ्समा बानो इमानुएलले १५ बल सामना गरी तीन रन बनाइन् । नेपालले एक रन मात्र वाइडका रूपमा अतिरिक्त दियो । सीता रानामगरले आफ्नो एक ओभरमा वाइड फ्याँकेकी थिइन् । 

बलिङमा नेपालका लागि कविताले दुई ओभरमा ६ रन खर्चदै दुई विकेट हात पारिन् । सीताले दुई ओभरमा एक मेडन राखी तीन रन दिँदै दुई विकेट लिइन् । करुणा भण्डारीले एक मेडनमा एक विकेट लिइन् । नेपाली बलरले दुई मेडन ओभर गरेका थिए । कतारले ब्याटिङ गरेको इनिङ्सको दोस्रो तथा तेस्रो बलमै विकेट गुमाएको थियो । पाँच ब्याट्सम्यान गुमाउँदा स्कोर बोर्डमा केवल दश रन मात्र जोडेको थियो ।