- वि.सं २o७८ कार्तिक २९ सोमबार
अस्ट्रेलिया पहिलोपटक आइसिसी पुरुष टी–२० विश्वकप क्रिकेट प्रतियोगिता विश्व च्याम्पियन बनेको छ । दुबईमा आइतबार सम्पन्न सातौँ संस्करणको फाइनलमा अस्ट्रेलियाले छिमेकी राष्ट्र न्युजिल्यान्डलाई आठ विकेटले हराउँदै टी–२० विश्वकपको उपाधि हात पारेको हो । अस्ट्रेलियाले जित्न नसकेको टी–२० विश्वकपको ट्रफी पनि आप्mनो पोल्टामा राख्यो । आइसिसीले आयोजना गरेको क्रिकेट प्रतियोगितालाई अस्ट्रेलियाले सर्वाधिक आठपटक जितेको छ ।
अस्ट्रेलियाले पाँचपटक एकदिवसीय विश्वकप, दुईपटक च्याम्पियन्स ट्रफी तथा एकपटक टी–२० विश्वकप हात पारेको छ । न्युजिल्यान्डले भने लगातार तीन विश्वकप फाइनल गुमाएको छ । सन् २०१५ र सन २०१९ को एकदिवसीय विश्वकप फाइनल न्युजिल्यान्डले गुमाएको थियो । सन् २०१० मा अस्ट्रेलिया पहिलोपटक फाइनल पुग्दा इंग्ल्यान्डसँग सात विकेटले पराजित भएको थियो ।
पहिलो ब्याटिङ गरेको न्युजिल्यान्डले २० ओभरमा चार विकेट गुमाएर एक सय ७२ रनको योगफल खडा गरेको थियो । प्रत्युत्तरमा अस्ट्रेलियाले १८.५ ओभरमा केवल दुई विकेटको क्षतिमा एक सय ७३ रन जोड्दै टी–२० विश्वकपकै नयाँ विजेताको ट्रफी उचाल्यो । अस्ट्रेलियाको जितमा म्यान अफ दी म्याच मिचेल मार्सले सर्वाधिक ७७ रनको योगदान दिए । उनले ५० बलमा ६ चौका र चार छक्का प्रहार गरे ।
यसैगरी, ग्लेन म्याक्सवेलले १८ बलमा चार चौका र एक छक्का प्रहार गरी २८ रनमा नटआउट रहे । म्याक्सवेलले टिम साउथीले फ्याँकेको बललाई चौकाका रूपमा प्रहार गरेका थिए । म्याक्सवेल र मार्सबीच तेस्रो विकेटका लागि ६६ रनको साझेदारी भएको थियो । अस्ट्रेलिया टी–२० विश्वकपको पहिलोपटक च्याम्पियन बन्दा म्यान अफ दी सिरिज डेभिड वार्नरले पुनः एकपटक जितको आधार बनाएका थिए । उनले ३८ बलमा चार चौका र तीन छक्काको सहयोगमा ५३ रनको योगदान दिए । वार्नरले मिचेल मार्ससँग दोस्रो विकेटका लागि ९२ रनको बलियो साझेदारी गरेका थिए । कप्तान आरोन फिन्च (५) को विकेट गुमाउँदा अस्ट्रेलिया १५–१ को कमजोर अवस्थामा थियो । वार्नर इनिङ्सको १२.२ ओभरमा ट्रेन्ट बोल्टद्वारा बोल्ड
भएका थिए ।
न्युजिल्यान्डको कमजोर सुरुवात
यसअघि ब्याटिङ गरेको न्युजिल्यान्डले पावर प्लेमा सोचेजस्तो सुरुवात गर्न सकेन । मार्टिन गुप्तिल र डार्यल मिचेलले पहिलो विकेटका लागि ३.५ ओभरमा २८ रनको साझेदारी गरे । फर्ममा रहेका मिचेललाई जोस हेजलउडले विकेट किपर वाडेबाट क्याच आउट गराए । मिचेलले आठ बलमा ११ रन मात्र जोडे ।
कप्तान केन विलियम्सनले मार्टिनसँग दोस्रो विकेटका लागि ४८ रन बटुले । क्रिजमा सेट भएका ब्याट्सम्यान मार्टिनको विकेट एडम जाम्पाले लिए । स्विप सट लगाउँदा मार्टिन स्टोनिसबाट क्याच आउट भए । मार्टिनले ३५ बलमा तीन चौकाको सहयोगमा २८ रन जोडेका थिए । न्युजिल्यान्डले ११.१ ओभरमा ७६–२ को प्रदर्शन गरेको थियो । यो अवस्थामा अस्ट्रेलियाले खेल पूर्णरूपमा नियन्त्रणमा राखेको थियो ।
विलियम्सनको आक्रामक ब्याटिङ
न्युजिल्यान्डका कप्तान विलियम्सनले मार्टिनको विकेट गुमाएसँग विस्फोटक रूपमा प्रस्तुत भए । विलियम्सनले अस्ट्रेलियाका मिचेल स्टार्कमाथि खनिए । स्टार्कविरुद्ध १२ बल समना गर्दा विलियम्सनले ३९ रन बटुले । इनिङ्सको १६औँ ओभरमा विलियम्सनले स्टार्कविरुद्ध २२ रन खोसे । यस ओभरमा उनले चार चौका र एक छक्का ठोके । टी–२० विश्वकपकै पहिलो शतकीय इनिङ्सतर्फ अग्रसर भएका विलियम्सनले आफ्नो विकेट १७.५औँ ओभरमा गुमाए । उनलाई हेजलउडले आउट पारे । लङ अफमा फिल्डिङ गरेका स्टिभ स्मिथले विलियम्सनको सहज क्याच समाते ।
विलियम्सनको विकेटसँगै खेल अस्ट्रेलियातर्फ ढल्कियो । हेजलउडले आफ्नो व्यक्तिगत तेस्रो ओभरमा ग्लेन फिलिप्स र विलियम्सनका महत्वपूर्ण विकेट लिएका थिए । विलियम्सनले ४८ बलमा १० चौका र तीन छक्काको सहयोगमा सर्वाधिक ८५ रन जोडे । फिलिप्सले समान एक छक्का र चौकाको सहयोगमा १८ रन बनाए ।
हेजलउडका तीन विकेट
फिलिप्स र विलियम्सनबीच तेस्रो विकेटका लागि ११.१ देखि १७.२ ओभरबीच ६८ रनको साझेदारी भएको थियो । इंग्ल्यान्डविरुद्ध विस्फोटक ब्याटिङ गरेको जेम्स निसिमले सात बलमा १३ रन जोडे । अस्ट्रेलियाका लागि हेजलउड सर्वाधिक सफल बलर सिद्ध भए । उनले चार ओभरमा १६ रन खर्चेर तीन विकेट लिए । जाम्पाले २६ रनमा एक विकेट हात पारे । अस्ट्रेलियाका मुख्य बलर स्टार्क खर्चिलो भए । चार ओभरमा ६० रन खर्चँदा पनि स्टार्क विकेटविहीन भए ।
