- वि.सं २o७८ कार्तिक २७ शनिबार
पर्साको पकाहामैनपुर गाउँपालिकाभित्रका सामुदायिक विद्यालयका शिक्षकहरू विद्यालय बन्द गरेर भ्रमणमा गएको पाइएको छ । चाडपर्व बिदा सकिएर भर्खर विद्यालय खुलेको छ । तर, शिक्षकहरू विद्यालयमा पढाउनुभन्दा भ्रमणतिर लागेका छन् । शुक्रबारदेखि मंगलबारसम्म पाँच दिनका लागि शिक्षकहरू भ्रमणमा गएको पाइएको हो ।
गाउँपालिका कार्यालयको पाँच लाख आर्थिक सहयोगमा उनीहरू नेपालका विभिन्न स्थानमा भ्रमणमा गएको पालिकाले जनाएको छ । गाउँपालिका कार्यालयले पालिकाभित्रका शिक्षकहरूका लागि दुईवटा ठुलो बसमा भ्रमणमा पठाएको स्थानीयवासीले बताएका छन् ।
पालिकाका अनुसार पालिकाभित्रका करिब ८८ जना भ्रमणमा निस्कने योजना रहे पनि ६७ जना मात्र शिक्षकलगायतका कर्मचारीहरू भ्रमणमा गएका छन् । पकाहामैनपुर गाँउपालिका कार्यालयका शिक्षक संयोजक दामोदार द्विवेदीले पालिकाको आर्थिक सहयोगमा पालिकाभित्रका शिक्षकहरू भ्रमणमा निस्किएको स्वीकार गरे ।
उनले अगामी मंगलबारसम्म पाँच दिनको भ्रमणमा काठमाडौं, पोखरा र लुम्बिनीमा बिताउने योजना रहेको बताए ।पालिकाभित्रका विद्यालयका प्रधानाध्यापकहरू आन्तरिक सहमतिअनुसार बिदा मिलाएर विद्यालय बन्द गरेको उनले बताए । गाउँपालिका अध्यक्ष विजय चौरसियाले विगत लामो समयदेखि शिक्षकहरूका लागि पालिकाबाट छुट्याइएको बजेटलाई सदुपयोग गरिएको बताए । उनका अनुसार नमुना विद्यालयको भ्रमण गर्ने उद्देश्यले शिक्षकहरू भ्रमणमा गएका छन् ।
