- वि.सं २o७८ कार्तिक १० बुधबार
कांग्रेस सभापति शेरबहादुर देउवाले मंसिरभित्र सम्पन्न हुने गरी १४औँ महाधिवेशनको कार्यतालिका बनाउन पार्टीको केन्द्रीय निर्वाचन समितिलाई निर्देशन दिएका छन् । मंगलबार सिंहदरबारस्थित पार्टी संसदीय दलको कार्यालयमा पार्टीका पदाधिकारी, पूर्वपदाधिकारी र निर्वाचन समितिका सदस्यहरूसँगको छलफलमा प्रधानमन्त्रीसमेत रहेका देउवाले निर्वाचन समितिलाई यस्तो निर्देशन दिएका पार्टीका सहमहामन्त्री डा.प्रकाशशरण महतले जानकारी दिए ।
‘पार्टी सभापतिले स्पष्ट रूपमा निर्वाचन समितिलाई सम्पूर्ण अधिकार छ, तपाईंहरूले यो प्रक्रियालाई चाँडोभन्दा चाँडो अगाडि बढाउनुहोस् र मंसिरभित्र महाधिवेशन गरिसक्नुपर्छ । त्यसकारण यो तलदेखि केन्द्रीय महाधिवेशन जुन छ, यो मंसिरभित्र हुनुपर्छ । र, त्यहीअनुरूप तपाईंहरूले कार्यतालिकाका लागि होमवर्क गर्नुस् भनेर सभापतिले स्पष्ट निर्देशन दिनुभएको छ,’ महतले भने ।
कांग्रेसले १४औँ महाधिवेशन आगामी ९–१२ मंसिरसम्म काठमाडौंमा गर्ने तय गरेको थियो । तर, तल्लो तहको अधिवेशनमा ढिलाइ भएपछि सभापति देउवाले मंसिरभित्र गरिसक्ने गरी कार्यतालिका तय गर्न निर्वाचन समितिलाई निर्देशन दिएका हुन् ।
