- वि.सं २o७८ कार्तिक ७ आइतबार
नाबालकहरूलाई साथमा राखी यौनजन्य गतिविधि गरेको आरोपमा जिल्ला प्रहरी कार्यालय कास्कीले एक क्यानेडियन नागरिकलाई पक्राउ गरेको छ । तीनजना बालकलाई साथमा राखी विभिन्न प्रलोभन देखाई अप्राकृतिक मैथुन तथा बालबालिकाविरुद्धको कसुर गरेको आरोपमा क्यानेडियन नागरिक ४४ वर्षीय रोबट किनकेलीलाई पक्राउ गरेको कास्कीका प्रहरी प्रमुख रमेश थापाले जानकारी दिए ।
पोखरा महानगरपालिका– ६ लेकसाइडमा नाबालकहरूलाई ललाइफकाई, डर, त्रास, धाकधम्की तथा विभिन्न प्रलोभनमा पारी यौनजन्य गतिविधि गर्दै आएको भन्ने सूचनाका आधारमा खटिएको प्रहरी टोलीले उनलाई पक्राउ गरेको हो ।
प्रहरीले छापा मार्ने क्रममा तीन नाबालकहरूलाई साथमा राखी यौनजन्य गतिविधि गर्दै गरेको अवस्थामा उनलाई फेला पारेको थापाले जानकारी दिए । प्रहरीले तत्कालै उनलाई पक्राउ गरी नाबालकहरूलाई उद्धार गरेको थियो ।
क्यानेडियन नागरिकलाई ल्यापटप १ थान, मोबाइल १ थान, राहदानी १ थानसहित पक्राउ गरिएको प्रहरीले जनाएको छ । उनलाई अप्राकृतिक मैथुन तथा बालबालिकाविरुद्धको कसुरमा अनुसन्धान कार्य अघि बढाइएको प्रहरीले जनाएको छ ।
