एमसिसीबारे शीघ्र निर्णय होस् : सुमार प्रधानमन्त्रीले भने– म प्रयास गर्दै छु, पर्खिनुहोस्

मिलेनियम च्यालेन्ज कर्पोरेसनकी कम्प्याक्ट अपरेसन हेर्ने उपाध्यक्ष फतेमा जेड सुमारले शुक्रबार प्रधानमन्त्री शेरबहादुर देउवासँगको शिष्टाचार भेटमा एमसिसी पास गरेर लिने कि नलिने शीघ्र निर्णयका लागि आग्रह गरेकी छिन् । सुमारले यथाशीघ्र संसद्बाट पारित नभए एमसिसीले अर्को मुलुकमा परियोजना लैजाने संकेत दिएकी छिन् । सकभर नेपालले एमसिसी परियोजना राखोस् भन्ने पक्षमा आफू रहेको सुमारको भनाइ थियो । 

प्रधानमन्त्री देउवाले एमसिसी संसद्बाट पारित गर्न आफूले राजनीतिक पहल थालेको जवाफ दिएका छन् । देउवाले केही समय पर्खिन आग्रह गरेको उनीनिकट स्रोतले बताएको छ । बिहीबार एमाले, एकीकृत समाजवादी र जनता समादवादी पार्टीका शीर्ष नेतालाई सुमारले नेपालले नलिए अन्य मुलुकमा एमसिसी परियोजना लैजाने बताएकी थिइन् । 

शुक्रबार सुमारले प्रधानमन्त्री देउवालाई भेट्नुअघि माओवादी केन्द्रका अध्यक्ष पुष्पकमल दाहाल प्रचण्ड, लोकतान्त्रिक समाजवादीका अध्यक्ष महन्थ ठाकुर, नेताद्वय राजेन्द्र महतो र शरत्सिंह भण्डारी र कांग्रेस नेता गगन थापासँग भेटेकी थिइन् । प्रधानमन्त्रीसँगको भेटमा कानुनमन्त्री ज्ञानेन्द्रबहादुर कार्की र मुख्यसचिव शंकरदास बैरागी पनि सहभागी थिए ।

‘सरकार र मिलेनियम च्यालेन्ज कर्पोरेसनबीच २०१७ मा सम्पन्न अनुदानसम्बन्धी कम्प्याक्ट अगाडि बढाउने विषयमा आफूले राजनीतिक स्तरमा छलफल जारी राखेको बताउनुभयो,’ भेटवार्तापछि अर्थ मन्त्रालयद्वारा जारी विज्ञप्तिमा भनिएको छ । अर्थ मन्त्रालयका अनुसार सुमारले एमसिसी सम्झौता यथाशीघ्र संसद्बाट पारित हुने विश्वास व्यक्त गरेकी थिइन् । 

स्रोतका अनुसार प्रधानमन्त्री देउवाले आफ्नो नेतृत्वको सरकारका पालामा हस्ताक्षर भएको एमसिसी कार्यान्वयनका पक्षमा आफू उभिएको बताएका थिए । एमसिसीका तर्फबाट पछिल्लोपटक पठाइएको प्रस्टीकरणपछि परिस्थिति सकारात्मक रहेको देउवाको भनाइ थियो ।  बिहीबार बिहान काठमाडौं आइपुगेकी उपाध्यक्ष सुमारले सुरुमा एमाले अध्यक्ष केपी ओली, एकीकृत समाजवादीका अध्यक्ष माधवकुमार नेपाल र जनता समादवादी पार्टीका नेताद्वय उपेन्द्र यादव र डा. बाबुराम भट्टराईसँग भेटेकी थिइन् । 

प्रचण्डले भने– राजनीतिक सहमतिमा निर्णय गर्छौँ 
शुक्रबार बिहान भेट्न पुगेकी एमसिसी उपाध्यक्ष सुमारलाई माओवादी केन्द्रका अध्यक्ष प्रचण्डले दलहरूबीच राजनीतिक सहमतिका आधारमा एमसिसीबारे निर्णय लिइने बताए । ‘भेटमा अध्यक्षले एमसिसीको विषयमा नेपालका सबै राजनीतिक दलहरूबीच सहमति बनाएर अगाडि बढ्न सकिने बताउनुभयो,’ प्रचण्डको सचिवालयद्वारा जारी विज्ञप्तिमा भनिएको छ ।

प्रचण्डले अहिलेको गठबन्धन अग्रगमनको संवाहक भएको पनि सुमारलाई बताएका थिए । एमसिसी उपाध्यक्षले एमसिसीबारे दबाब दिन नभई स्थिति बुझ्न नेपाल आएको बताएकी थिइन् । उनले यसबारे सकारात्मक निर्णय हुनेमा आफू आशावादी रहेको उल्लेख गरेकी थिइन् ।

सुमारले शनिबार एमसिए नेपालका पदाधिकारीसँग छलफल गर्ने कार्यक्रम छ । उनले आइतबार एक दर्जन विज्ञ तथा सरकारी उच्च अधिकारीसँग राउन्डटेबल छलफल गर्ने कार्यक्रम छ । भ्रमणको अन्तिममा पत्रकार सम्मेलन गरेर उनी अमेरिका फर्किने कार्यक्रम छ ।