- वि.सं २o८१ जेठ १ मंगलबार
अमेरिकी राजदूत र्यान्डी बेरीले नवनियुक्त प्रधानमन्त्री शेरबहादुर देउवालाई भेटेर बधाई तथा शुभकामना दिएका छन् । प्रधानमन्त्री देउवालाई भेट्न बिहीबार बिहान राजदूत बेरी बुढानीलकण्ठस्थित देउवानिवासमा पुगेका थिए ।
भेटमा राजदूत बेरीले नेपालको नयाँ प्रधानमन्त्रीको रूपमा नियुक्त भएकोमा देउवालाई बधाई तथा शुभकामना दिएका छन् । भेटपछि सामाजिक सञ्जालमार्फत प्रधानमन्त्री देउवाले आफ्नो कार्यकालमा नेपाल र अमेरिकाको मित्रता र साझेदारीलाई थप अघि बढाउने विश्वास व्यक्त गरेका छन् ।
यसअघि मंगलबार प्रधानमन्त्री नियुक्त भएपछि राजदूत बेरीले सामाजिक सञ्जालमार्फत देउवा नेपालको प्रधानमन्त्री नियुक्त भएकोमा बधाई दिँदै ७५ वर्षदेखि नेपालसँगको मित्रतालाई अघि बढाउन उत्सुक रहेको प्रतिक्रिया जनाएका थिए ।
