नेप्से बढेसँगै कारोबार रकममा पनि सुधार

विकास बैंक, वाणिज्य बैंक, फाइनान्स, माइक्रो फाइनान्स समूहमा लगानीकर्ताको आकर्षण

असारको सुरुदेखि नै ओरालो लागेको नेप्से नयाँ आर्थिक वर्षको सुरुवातनजिक आइपुग्दा सकारात्मक हुने संकेत देखिएको छ । बिहीबार नेप्से २४ अंकले बढेर सकारात्मक संकेत दिएको हो । 

अझै पनि लगानीकर्ता ‘पर्ख र हेर’को अवस्थामा रहेर नयाँ आर्थिक वर्षपछि सेयर बजारमा सक्रियता बढाउने पक्षमा रहेका छन् । मौद्रिक नीतिले पनि बजारलाई प्रभाव पार्ने हुँदा केही लगानीकर्ताको ध्यान त्यतातर्फ पनि मोडिएको विश्लेषकहरू बताउँछन् । नेप्से बढेसँगै ओरालो लागेको सेयर खरिद–बिक्री रकममा पनि केही सुधार देखिएको छ । जसलाई विश्लेषकहरू सकारात्मक पक्ष भएको बताउँछन् । सेयर बजारलाई कारोबार भ्यालुका आधारमा पनि कतिपय विश्लेषकले बजारको भविष्य थाहा पाउन सकिने बताउँछन् ।

बिहीबार धितोपत्र र ऋणपत्र गरी कारोबारमा आएका २ सय २३ कम्पनीको १ करोड ३१ लाख कित्ता–इकाइ सेयर किनबेच हुँदा ४ अर्ब ८१ करोड ५५ लाख रुपैयाँको कारोबार भएको छ । अघिल्लो दिन ४ अर्ब ६७ करोड रुपैयाँको कारोबार भएको थियो । सबैभन्दा बढी कारोबार हुने कम्पनीमा नेपाल बैंक लिमिटेड रहेको छ । बैंकको २१ करोड ५२ लाख रुपैयाँको सेयर कारोबार भएको हो । त्यस्तै, हिमालयन डिस्टिलरीको १७ करोड ४६ लाख रुपैयाँ, एनआइसी एसिया बैंकको १६ करोड ७९ लाख रुपैयाँ र नेपाल इन्फ्रास्ट्रक्चर बैंक (निफ्रा)को १४ करोड रुपैयाँको कारोबार भएको छ ।

कारोबारमा आएका १३ समूूहमध्ये ११ वटा समूूहको सेयर मूल्य बढेको छ भने ट्रेडिङ र अन्य समूूहको सूचक भने नकारात्मक रहेको छ । फाइनान्स, विकास बैंक, जलविद्युुत् समूहका लगानीकर्ताले साताको अन्तिम कारोबारका दिन नाफा आर्जन गर्न सफल भएका छन् ।

बिहीबार नेप्से परिसूचक २३ दशमलव ९७ अंकले बढेर २ हजार ८ सय २५ दशमलव ११ बिन्दुुमा पुगेर बन्द भएको छ । त्यस्तै, ‘क’ वर्गको कम्पनीमापक सेन्सेटिभ इन्डेक्स ४ दशमलव ४१ अंकले बढेर ५ सय २९ दशमलव ६६ बिन्दुमा पुगेको छ ।

गुहेश्वरी मर्चेन्ट बैंक एन्ड फाइनान्स कम्पनीको सेयर सर्किट मूल्यमा कारोबार भएको छ ।  कम्पनीको सो दिन ९ दशमलव ४७ प्रतिशतले सर्किट मूल्यमा कारोबार भएर ४१ रुपैयाँले बढ्दै प्रतिसेयर मूल्य ४ सय ४७ रुपैयाँ पुगेको छ । जोशी हाइड्रोपावर, घलेम्दी हाइड्रो, युनियन हाइड्रोपावर, मल्टिपर्पाेज फाइनान्स कम्पनीको करिब ६ प्रतिशतले बढ्दा यी कम्पनीका  लगानीकर्ताले उल्लेख्य नाफा आर्जन गर्न सफल भएका छन् ।

सबैभन्दा धेरै घट्ने कम्पनीमा कर्पोरेट डेभलपमेन्ट बैंक रहेको छ । यसको ३ दशमलव ६१ प्रतिशतले सेयर मूल्य घटेको छ भने दूरसञ्चार, सिइडिबी हाइड्रो कम्पनीको १ प्रतिशतले घटेको छ ।