- वि.सं २o७८ असार १९ शनिबार
लगातारको वर्षापछि आएको बाढीका कारण बारपाक सुलिकोट र अजिरकोकट जोड्ने पक्की पुल भासिएको छ । दरौदीमा खोलामा शुक्रबार राती आएको बाढीले पुल भासिएपछि आउजाउ ठप्प बनेको बारपाकका स्थानीय जीत बहादुर घलले जानकारी दिए ।
‘हिजो दिउँसो देखि ठुलो पानी परेको थियो । राती दरौदीमा खोलामा आएको बाढी बालुवापट्टिको कुनाबाट छिरेको रहेछ । त्यसले बालुवा तिरको भाग सर्लक्कै लगेछ,’ उनले भने । पक्की पुलको बालुवापट्टि साइटमा बाढीले धेरै क्षति पुर्याएको उनको भनाइ छ ।
बालुवामा रहेका पुल भासिएपछि उत्तरी गोरखा बारपाक, लाप्राक र गुम्दा जाने सडक पुर्णरुपमा अवरुद्ध बनेको छ । ‘अव बारपाक, लाप्राक, गुम्दा जाने सबै बाटो बन्द भयो । वैकल्पिक बाटो छैन । खोला तरेर जान सक्ने अवस्था छैन । माथिबाट आएको मान्छे माथि नै थुनियो,’ उनले भने । पुल नबन्दा सम्म तत्काल आउजाउ गर्ने बाटो पुर्णरुपमा अवरुद्ध बनेको उनले बताए ।
‘तत्काल तलपट्टिबाट ढुङ्गाहरु थुपारेर माथि ग्याबिन जाली लगाएर पुल बराबरको माटो थुपार्न सकियो भने आउन गर्न सकिन्छ, नत्र भने त अरु उपाय नै छैन । पानी परेको परै छ । अँझै कहिलेसम्म पर्ने हो थाहा छैन ,’ उनले भने ।
