हरेक मान्छेको सपनाको सहर हुन्छ राजधानी । तर, बारम्बार ती सपनामाथि राजधानीले कुठाराघात गरिरहेको छ । कहिले भूकम्पले थिलथिलो बनाएको शरीर लिएर सपनाहरू गाउँ फर्किन्छन् त कहिले कोरोनाको महामारीले च्यापेर ।
अघिल्लो वर्षको पीडा मत्थर नबनाईकन फेरि पनि राजधानीले सपनाहरूलाई पीडित बनाउँदै गाउँ फर्काइदिएको छ । ती सपना अहिले राजधानीको नयाँ बसपार्क, कलंकी अनि भक्तपुरको जडीबुटी हुँदै गुन्टा च्यापेर गाउँ फर्किरहेका छन् । अञ्जु पन्तले भनेझैँ साँच्चै अहिले धेरै सपना यो सहर छोडेर टाढा अर्थात् आफ्नै गुँड फर्किरहेका छन् ।