मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८० चैत ६ मंगलबार
  • Tuesday, 19 March, 2024
केदार दाहाल काठमाडौं
२०७७ चैत ३० सोमबार ११:३६:००
Read Time : > 1 मिनेट
अर्थ प्रिन्ट संस्करण

भारतीय नागरिक नेपाल हुँदै साउदीतर्फ काठमाडौंका होटेल भारतीयले भरिभराउ

पछिल्लो १५ दिनमै ६ हजार ७८ जना भारतीय हवाईमार्गबाट नेपाल भित्रिए, दिल्ली–काठमाडौंको हवाई भाडा ३० हजारसम्म पुग्यो

Read Time : > 1 मिनेट
केदार दाहाल, काठमाडौं
२०७७ चैत ३० सोमबार ११:३६:००

कोभिड–१९ का कारण खाडी मुलुकले भारतमा सीधा उडान रोकेपछि भारतीय नागरिकहरू नेपालको बाटो हुँदै खाडी मुलुक जान थालेका छन् । जसका कारण नेपालबाट हुने उडानहरू खचाखच भरिन थालेका छन् । त्यस्तै, भारतबाट नेपाल आउने उडानमा पनि यात्रुहरूलाई टिकट पाउन मुस्किल हुन थालेको छ । कोभिड–१९ पछि भारत र नेपालले एक–एक उडान मात्र गर्न पाउने सहमतिअनुसार हवाई यातायात चलिरहेको छ । जसमा तेस्रो मुलुकमा यात्रुसमेत बोक्न प्रतिबन्ध रहेको छ । 

कोरोना भाइरस संक्रमणको जोखिम बढेको भन्दै साउदी अरबले फेब्रुअरी पहिलो सातादेखि भारतलगायत २० देशबाट हुने सीधा उडान रोकेपछि भारतीयहरूले नेपालको बाटो रोजेका हुन् । साउदीले नेपालसँग भने सीधा उडानमा रोक लगाएको छैन । 

साउदीले भारतलगायत देशमा पछिल्लो १४ दिन यात्रा गरेकाहरूलाई आफ्नो देश प्रवेशमा रोक लगाएको थियो । यात्रु नै नभएपछि उडान बन्द भयो । साउदीको उक्त नियमपछि भारतीयहरू नेपालको बाटो भएर साउदी जान थालेका हुन् । साउदी अरबका होटेललगायत अन्य क्षेत्रमा १५ लाख भारतीयले काम गर्दै आएको अनुमान छ ।

भारतीयहरू नेपाल आएर १४ दिन क्वारेन्टिन बसेर मात्रै साउदी अरबको यात्रामा निस्कने गरेका छन् । जसका कारण नेपालका बसपार्क, सुन्धारा, विमानस्थल क्षेत्र तथा गौशाला क्षेत्रका होटेलहरू भरिभराउ हुन थालेको छ ।  भारतीयहरूलाई १४ दिन क्वारेन्टिन नेपालमा राखेपछि साउदीले नेपालबाट जाने अनुमति दिएका कारण होटेलमा पाहुनाको संख्या बढेको होटेल व्यवसायी महासंघका अध्यक्ष हीरा शाहले जानकारी दिए । साना होटेल मात्रै नभएर तारे होटेलमा समेत व्यवसाय बढेको उनको भनाइ छ । भारतीयहरूलाई नेपालसम्म ल्याउन नेपाल र भारतका ट्राभल एजेन्सीहरूले सघाइरहेका हुन्छन् ।  

 एयरलाइन्स कम्पनी मालामाल 
नेपाल र भारत सरकारबीच सम्पन्न भएको एयर बबल एग्रिमेन्टअनुसार हाल नेपाल र भारतबीच दुवैतर्फका एक–एकवटा उडान भइरहेको छ । कुनै पनि देशले आफूले चाहँदैमा उडान संख्या थप गर्न सक्दैनन् । दुवैतर्फको उडानमा चाप देखेर नेपाल वायुसेवा निगमले भारतको मुम्बई र बैंग्लोरबाट पनि उडान गर्न माग गर्दै पहल गरिरहेको निगमका प्रबन्ध निर्देशक डिमप्रकाश पौडेलले बताए ।

‘अहिले भारतीयका कारण निगमको उडानमा खचाखच हुँदा आम्दानीसमेत बढेको छ,’ पौडेलले भने । अहिले काठमाडौं–दिल्ली–काठमाडौंको उडानमा हवाई भाडा ३० हजारसम्म पुगेको छ । काठमाडौं–दिल्ली–काठमाडौंको न्यूनतम उडान ७ हजार रुपैयाँ रहेको छ ।  

जसका कारण बिरामी र विद्यार्थीलाई आउन–जान समस्या भएको छ । उडान थप्न पहल भइरहेको र थप्न सकेमा सबैलाई सहज हुने पौडेलले बताए । दिल्लीबाट काठमाडौं उडानमा अहिले ७० प्रतिशत भारतीय रहेकोसमेत निगमको भनाइ छ । 
अघिल्लो महिना ७ हजार भारतीय नेपाल आएका थिए । तर, पछिल्लो १५ दिनमै ६ हजार ७८ जना भारतीय हवाईमार्गबाट नेपाल आएका छन् । उक्त अवधिमा ३ हजार २ सय भारतीयहरू काठमाडौं विमानस्थलबाट बाहिरिएका छन् । खाडी मुलुकमा अहिले काठमाडौंबाट हिमालयबाहेक नेपाल वायुसेवा निगम, एयर अरेबिया, फ्लाई दुबई, कतार एयरवेजलगायत एयरलाइन्सले उडान गर्दै आएका छन् ।