- वि.सं २o७७ चैत १८ बुधबार
नेकपा एमालेकी नेतृ अष्टलक्ष्मी शाक्यले पार्टीभित्रको एकतालाई बलियो बनाउन आत्मसमीक्षा गरेर अगाडि बढ्नुपर्ने आवश्यकता रहेको बताएकी छिन् ।
नेपाल कम्युनिस्ट पार्टी (एमाले) बागमती प्रदेश संगठन कमिटीको बुधबार बसेको बैठकमा नेतृ शाक्यले अहिलेको निषेधको राजनीतिले कम्युनिस्ट आन्दोलन नै खतरामा पर्ने सम्भावना बढेको पनि बताइन् ।
उनले भनिन्, ‘तपाईं–हाम्रै कारणले गर्दा, हामीभित्रकै कारणले आज हामी कमजोर अवस्थामा पुगेका छौँ । हामी एक–अर्कामा निषेधको राजनीति गरिरहेका छौँ । कम्युनिस्ट पार्टीलाई एकताबद्ध र बलियो बनाएर होइन आफैँ–आफैँ लडेर हामी सिद्धिने स्थितिमा पुगेका छौँ । त्यसो भएको हुनाले पनि यतिवेला हामीले आत्मसमीक्षा गर्ने कि नगर्ने र हामीले यस्तो कुरा सच्याउने कि नसच्याउने ? यदि नेकपा एमाले बलियो बनाएर अगाडि बढ्नु छ भने, समाजवादको लक्ष्य प्राप्त गर्ने हो भने हामीले आमुल परिवर्तन गरेर देशलाई अगाडि बढाउने हो भने, समृद्धि चाहने हो भने हामी सत्तामा भएको पार्टीले आफूलाई सच्याउनैपर्छ । हामी रूपान्तरित हुनैपर्छ । हामीले निषेधको राजनीति, गुटको राजनीति गर्नुहुँदैन ।’
