- वि.सं २o७७ फाल्गुण १६ आइतबार
अख्तियार दुरुपयोग अनुसन्धान आयोगले छुट्टाछुट्टै घटनामा घुससहित पक्राउ परेका पाँचजनाविरुद्ध मुद्दा चलाएको छ । वाणिज्य, आपूर्ति तथा उपभोक्ता हित संरक्षण विभागका अधिकृत अर्जुन सुवेदी, नायव सुब्बा नरेन्द्र चन्द र लेखापढी व्यवसायी रामबाबु दाहाल तथा सप्तरीस्थित नापी कार्यालय कञ्चनपुरका निमित्त कार्यालय प्रमुख सर्वेक्षक हरिचन्द्र ठाकुर र लेखनदास अरुणकुमार यादवविरुद्ध आइतबार विशेष अदालतमा मुद्दा दायर गरेको हो ।
अख्तियारले सेवाग्राहीसँग आठ हजार रुपैयाँ घुस लिएको आरोपमा सुवेदी, चन्द र दाहाललाई केही साताअघि मात्र पक्राउ गरेको थियो । सुवेदीले व्यवसाय दर्ताका लागि घुस लिन मञ्जुर गरेको, चन्दले घुस रकम बुझेको तथा दाहालले मोलाहिजा गरेको दाबी गरिएको छ ।
त्यसैगरी, सप्तरीमा रहेको नापी कार्यालयका निमित्त कार्यालय प्रमुख रहेका सर्वेक्षक ठाकुरले जग्गा कित्ताकाट गरिदिने भन्दै लेखापढी व्यवसायी यादवमार्फत १५ हजार रुपैयाँ घुस लिएको दाबी अख्तियारले गरेको छ ।
