- वि.सं २o७७ पौष २६ आइतबार
धनकुटा बजारमा आज बिहान ट्याक्टरले किच्दा विद्यालय जाँदै गरेकी एक बालिकाको मृत्यु भएको छ ।
धनकुटा नगरपालिका– ७ श्रीवानीमा प्रदेश १–०२–००३ त ६१२ नम्बरको ट्याक्टरले किच्दा धनकुटा नगरपालिका– ८ पेलेकपाङकी १५ वर्षीया बालिका रेबिका आठपहरिया राईको घटनास्थलमै मृत्यु भएको हो ।
धनकुटा नगरपालिका– ७ चुलिवनस्थित त्रिवेणी माध्यमिक विद्यालयमा कक्षा– ९ मा अध्यायनरत रेबिकालाई विद्यालय जाँदै गर्दा बिहान करिब ९ः३० बजे ट्याक्टले किचेको थियो ।
स्थानीय देवी श्रेष्ठको निर्माणाधीन घरका लागि बालुवा ल्याएर घोप्ट्याउने क्रममा ट्याक्टरको हाइड्रोलिक ट्रली पल्टिएर दुर्घटना भएको जिल्ला ट्राफिक प्रहरी कार्यालयका प्रमुख सइ सुरेन्द्र खड्काले बताए ।
घटनापछि ट्याक्टर र चालक सहिदभूमि गाउँपालिका– ४ का २९ वर्षीय छत्रबहादुर विश्वकर्मालाई प्रहरीले नियन्त्रणमा लिएको छ ।
बालिकाकाे शवलाई पोस्टमार्टमका लागि जिल्ला अस्पताल धनकुटामा राखिएको छ ।
