- वि.सं २o७७ कार्तिक ६ बिहीबार
कैलालीमा सवारी दुर्घटनामा परी दुईजनाको मृत्यु भएको छ ।अन्य तीनजना घाइते भएका छन् ।
बसको ठक्करबाट लम्की–चुहा नगरपालिका– ९ प्रतापपुरकी ३५ वर्षीया भागरथी रेग्मीको मृत्यु भएको छ ।
बर्दगोरिया गाउँपालिका– ४ चमेलीपुरमा सुपप्र ०१००८ प २३०९ नम्बर मोटरसाइकलमा सवार रेग्मीलाई सोही दिशातर्फ गइरहेको स१प ९५७ नम्बरको बसले बुधबार साँझ साढे ६ बजेतिर ठक्कर दिएको थियो ।
मोटरसाइकलका चालक लम्कीचुहा नगरपालिका– ९ प्रतापुरका रामबहादुर चौधरी घाइते भएका र उनको घोडाघोडी अस्पताल सुखडमा उपचार भइरहेको प्रहरीले जनाएको छ ।
ठक्कर दिने बसका चालक ३६ वर्षीय खकेन्द्र अधिकारीलाई प्रहरीले नियन्त्रणमा लिएको इलाका प्रहरी कार्यालय सुखडका प्रमुख प्रहरी नायब उपरीक्षक सागर बोहराले जानकारी दिए ।
रेग्मी नेपाली कांग्रेसकी कैलाली क्षेत्र नम्बर २ की क्षेत्रीय कोषध्यक्षसमेत हुन् ।
मृतकका आफन्तले पूर्व–पश्चिम राजमार्गको सुखद सडकखण्ड अवरुद्ध पारेका छन् ।
यस्तै, पूर्वपश्चिम राजमार्गको चिसापानीमा मोटरसाइकल अनियन्त्रित भएर दुर्घटना हुँदा लम्कीचुहा नगरपालिका– १ का रंगप्रसाद न्यौपानेको मृत्यु भएको छ ।
न्यौपानेले चलाएको सुपप्र ०१००८प १६२५ नम्बरको मोटरसाइकल गएराति १२ बजेतिर अनियन्त्रित भएर दुर्घटना हुँदा घाइते भएपछि उपचारका लागि टीकापुर अस्पताल लगिएको र उनको उपचारकै क्रममा गएराति मृत्यु भएको इलाका प्रहरी कार्यालय चिसापानीले जनाएको छ ।
यस्तै मोटरसाइकलको पछाडि सवार लम्कीचुहा नगरपालिका– १ कै ३९ वर्षीय जयप्रकाश न्यौपाने र ५० वर्षीय जन्मजय न्यौपाने घाइते भएका छन् ।
उनीहरूको लालरत्न अस्पतालमा उपचार भइरहेको छ । दुवैजनाको अवस्था मध्यम रहेको प्रहरीले जनाएको छ ।
