- वि.सं २०८१ बैशाख ७ शुक्रबार
खाद्य व्यवस्था तथा व्यापार कम्पनी लिमिटेडले कात्तिक ३ गतेदेखि काठमाडौं उपत्यकामा खसीबोका बिक्री सुरु गर्ने भएको छ ।
कम्पनीको थापाथलीस्थित प्रादेशिक कार्यालय परिसरबाट कात्तिक ३ गतेदेखि दसैँका लागि खसीबोका बिक्री–वितरणको काम सुरु हुने भएको हो ।
कम्पनीले बजार मूल्य नियन्त्रणका लागि भन्दै हरेक वर्षको दसैँमा खसी, बोका र च्याङ्ग्रा बिक्री गर्दै आएको छ । तर, यसपटक प्राविधिक कठिनाइले गर्दा मुस्ताङबाट च्याङ्ग्रा ल्याउन नसकिएको कम्पनीले बताएको छ ।
यस्तै दुई हजार खसीबोका र च्याङ्ग्रा बिक्री गर्ने योजना रहे पनि आयातमा कठिनाइ हुँदा केही संख्यामा खसी र बोका मात्रै बिक्रीमा राखिने कम्पनीका बागमती प्रदेश कार्यालयका प्रमुख पवित्रा गौतमले बताइन् ।
यस वर्ष तुल्सीपुर, दाङ र हेटौँडाबाट एक हजारवटा खसीबोका ल्याइएको उनले बताइन् ।
कम्पनीले यसअघि दसैँका लागि एक हजारवटा खसीबोका र एक हजारवटा च्याङ्ग्रा बिक्री गर्ने बताएको थियो ।
तर, कोराना भाइरसको संक्रमणले गर्दा बजारमा आमउपभोक्ताको क्रयशक्ति घटेको अनुमान गरिएकाले यस वर्ष कम आपूर्ति गर्न लागिएकोउनकाे भनाइ छ ।
पहिलो चरणमा एक हजार संख्यामा खसीबोका ल्याई बिक्रीमा राखिने र माग बढ्दै गए बजारलाई सन्तुलित राख्न थप आयात गर्न सकिने गौतमले बताइन् ।
यस वर्ष कम्पनीले खरिद गर्दा नै खसीबोकाको मूल्य गत वर्षभन्दा ४० रुपैयाँ बढी परेकाले अघिल्लो वर्षभन्दा केही बढी मूल्य कायम हुन सक्ने गौतमले बताइन् ।
मूल्य निर्धारण भने आइतबार साँझ मात्रै तय हुने उनको भनाइ छ ।
कम्पनीले गत वर्ष जिउँदो खसीको मूल्य प्रतिकिलो पाँच सय ६० रुपैयाँ निर्धारण गर्दै बिक्री–वितरण गरेको थियो । उक्त मूल्यमा प्रतिकिलो १० रुपैयाँ सहुलियत दिएर बिक्री गरेको थियो ।
कम्पनीले यसपटक पनि प्रतिकिलो १० रुपैयाँ सहुलियत दिने बताएको छ । दसैँका वेला काठमाडौं उपत्यकामा करिब ५० हजार खसी, बोका र च्याङ्ग्रा खपत हुने अनुमान छ ।
दसैँलाई लक्षित गरेर निजी व्यवसायीले समेत गाउँगाउँमा गएर खसीबोका खरिद गरेर बजारमा ल्याउन सुरु गरिसकेका छन् ।
स्थानीय उत्पादनले माग धान्न नसकेपछि छिमेकी मुलुक भारत र चीनबाट समेत खसीबोका र च्याङ्ग्रा आयात हुने गर्छ ।
