ताप्लेजुङमा गुडिरहेको ट्रयाक्टरबाट खसेर एकजनाको मृत्यु भएको छ । जिल्ला प्रहरी प्रमुख डिएसपी महेन्द्र श्रेष्ठका अनुसार मेची राजमार्गअन्तर्गत फुङलिङ नगरपालिका– ७ बहानन्दे सडकखण्डमा ना.६त ३००० नम्बरको ट्रयाक्टरबाट खसेर स्थानीय २७ वर्षीय दीपेन्द्र ओख्राबु लिम्बूको मृत्यु भएको छ ।
श्रेष्ठका अनुसार ट्रयाक्टर काबेलीबाट बालुवा बोकेर सदरमुकाम फुङलिङतर्फ आउँदै गरेको थियो ।
यसैबीच, सदरमुकाम फुङलिङस्थित पराजुली चौकबाट वीरेन्द्रचौकतर्फ जाँदै गरेको मे.१ज २५६४ नम्बरको बोलेरो जिपको ठक्करबाट एक पैदलयात्री गम्भीर घाइते भएकी छिन् । फुङलिङ नगरपालिका– ५ बस्ने ३५ वर्षीया मञ्जु राई घाइते भएकी हुन् । उनी जिल्ला हुलाक कार्यालयमा कार्यरत छिन् ।
राईको टाउकोमा गहिरो चोट लागेको छ । उनको जिल्ला अस्पताल ताप्लेजुङमा उपचार भइरहेको डिएसपी श्रेष्ठले जानकारी दिए ।