दक्षिणी सुडानको मैदानका कारण सलाहलाई विश्राम

इजिप्टका प्रमुख स्ट्राइकर मोहमद सलाहले दक्षिण सुडानविरुद्धको अफ्रिका कप अफ नेसन्स छनोट खेल गुमाउने भएका छन् । दक्षिण सुडानको राजधानी जुबामा आगामी मंगलबार कृत्रिम मैदानमा खेल खेलिने भएकाले सलाहलाई विश्रम दिइएको इजिप्ट फुटबल संघले जनाएको छ । कृत्रिम मैदानमा खेल्दा चोटको जोखिम बढी हुने भएकाले सलाहलाई बाहिर राखेको संघको दाबी छ ।

‘घाँसे मैदानको तुलनामा कृत्रिममा प्रतिस्पर्धा गर्दा खेलाडीले धेरै जोखिम उठाउनुपर्छ । यस्तोमा प्रमुख खेलाडीलाई चोटबाट जोगाउन बाहिर राखेका हौँ,’ संघले जारी गरेको विज्ञप्तिमा भनिएको छ, ‘यसबारे भएका केही अध्ययनले प्राकृतिक मैदानको तुलनामा कृत्रिममा चोटको जोखिम बढी छ ।’

इजिप्टका प्रशिक्षक होसाम हसनले पनि सलाहलाई सम्भावित चोटबाट जोगाउन विश्राम दिने निर्णय भएको बताए । गत शुक्रबार एंगोलाविरुद्धको खेलमा सलाह करिब एक घण्टा मैदानमा रहेर बाहिरिएका थिए । ३४ वर्षीय सलाहले गत सिजन इंग्लिस प्रिमियर लिग त्यागेका थिए । उनले लिभरपुल छाडेर टर्किस क्लब ट्राब्जोनस्पोरसँग आबद्ध भएका थिए । लिभरपुलमा नौ वर्ष बिताउँदा उनले ४४२ खेलमा २५७ गोल गरेका थिए । लिभरपुललाई उपाधि खडेरी तोड्दै उनले प्रमुख नौ ट्रफी दिलाएका थिए ।

यसमध्ये युरोपियन च्याम्पियन्स लिग प्रमुख मानिन्छ । ट्राब्जोनस्पोरबाट प्रतिस्पर्धा गरिरहेका सलाहले टर्किस सुपर लिगमा ६ खेलमै सात गोल गरेका छन् । यसैगरी उनले दुई असिस्ट गरिसकेका छन् । लिभरपुल छाड्दा सलाह साउदी प्रो लिगमा जाने जनाएका थिए । तर, उनले अन्तिम समयमा टर्किस क्लब रोजेका थिए । 

 इंग्ल्यान्डको हार 
वेम्बली मैदानमा नेसन्स लिगमा विश्व च्याम्पियन स्पेनले शनिबार राति इंग्ल्यान्डलाई ३–२ ले हराएको छ । यस जितसँगै स्पेनको अपराजित यात्रा ३९ खेलसम्म पुगेको छ । इंग्ल्यान्डविरुद्ध खेलको दोस्रो मिनेटमै लामिन यमालले स्पेनलाई १–० को अग्रता दिलाएका थिए । इंग्ल्यान्डका मार्कको गल्तीमा यमालले गोल गरेका हुन् । खेलको ३६औँ मिनेटमा इंग्ल्यान्डले बराबरी गोल फर्काएको थियो । एन्थोनी गोर्डनले जुड बेलिंघमको पासमा इंग्ल्यान्डलाई १–१ बराबरीमा ल्याए । बराबरी गोलपछि इंग्ल्यान्ड थप आक्रामक बनेको थियो ।

खेलको ४०औँ मिनेटमा कप्तान ह्यारी केनले इंग्ल्यान्डलाई खेलमा पहिलोपटक २–१ को अग्रता दिलाए । दोस्रो हाफमा स्पेनले उत्कृष्ट पुनरागमन गर्‍यो । खेलको ५५औँ मिनेटमा इंग्ल्यान्डले पेनाल्टी पाएको थियो । तर, केनले त्यसलाई गोलमा परिणत गर्न सकेनन् । स्पेनका रोड्रीले डिबक्समा बेलिंघमलाई लगाएपछि इंग्ल्यान्डले पेनाल्टी पाएको थियो । जसलाई केनले प्रहार गरेका थिए । उनको प्रहार क्रसबारमा लागेको थियो । 

खेलको ६०औँ मिनेटमा एलेक्स बाएनाले स्पेनलाई २–२ को बराबरीमा ल्याए । इंग्ल्यान्डका निकोले बल नियन्त्रणमा लिन नसक्दा स्पेनले त्यसको फाइदा उठाएको हो । खेलको ७४औँ मिनेटमा स्पेनले ३–२ को अग्रता लियो । स्पेनका लागि मिखेल ओयार्जाबालले निर्णायक गोल गरे । उनले गोलरक्षकविरुद्ध चिप गर्दै विजयी गोल गरेका हुन् ।