ऊर्जा, जलस्रोत तथा सिँचाइमन्त्री विराजभक्त श्रेष्ठले बाढीबाट प्रभावित मानिसहरूलाई मनोसामाजिक परामर्श दिनुपर्ने बताएका छन्।
आइतबार छाउनीस्थित वीरेन्द्र सैनिक अस्पतालमा भोटेकोशी बाढीमा घाइते भएका जलविद्युत् आयोजनाका कर्मचारी र परिवारलाई भेटेपछि मन्त्री श्रेष्ठले यस्तो बताएका हुन्।
घाइतेहरूको स्वास्थ स्थितिबारे जानकारी लिएपछि श्रेष्ठले भने, ‘उहाँहरूको स्वास्थ्य अवस्था सुधारोन्मुख छ। पानी र लेदोबाट भएका घाउहरू निको हुँदै छ। शारीरिक घाउ चोटहरू निको हुन थालेको छ। मानसिक र मनोवैज्ञानिक परामर्श आवश्यक छ।’
मन्त्री श्रेष्ठले त्रिशूली थ्री ‘ए’ जलविद्युत् आयोजनाबाट उद्धार गरिएका प्राधिकरणका मेकानिकल फोरम्यान सञ्जय साह र मेकानिकल सुपरभाइजर कबिर महर्जन, माथिल्लो त्रिशूली १ बाट उद्धार गरिएका चिनियाँ नागरिक र स्याफ्रुबेँसीबाट उद्धार गरिएकी एक किशोरीको स्वास्थ्य अवस्थाको जानकारी लिएका थिए।
