हेटौँडा हुँदै काठमाडौं आउजाउ गर्न नयाँ रुट तोकियो

पहिराेका कारण पृथ्वी राजमार्ग अवरुद्ध भएपछि हेटौँडा-काठमाडौं आवागमनलाई सुरक्षित र व्यवस्थित बनाउन जिल्ला प्रशासन कार्यालय मकवानपुरले नयाँ ट्राफिक व्यवस्थापन योजना लागू गरेको छ । पछिल्ला दुई दिनको सवारी चाप, वैकल्पिक सडकको क्षमता र यात्रुको सुरक्षालाई विश्लेषण गर्दै प्रशासनले भदौ १६ गतेदेखि लागू हुने गरी नयाँ रुट व्यवस्थापन सार्वजनिक गरेको हो ।

जिल्ला प्रशासन कार्यालय मकवानपुरका अनुसार पृथ्वी राजमार्ग बन्द भएपछि काठमाडौं आउने र जाने अधिकांश सवारी हेटौँडा हुँदै सञ्चालन भइरहेका छन् । यसकारण त्रिभुवन राजपथ, कान्ति लोकपथ तथा भीमफेदी-कुलेखानी सडकमा अत्यधिक चाप बढेपछि नयाँ व्यवस्था लागू गरिएको हो ।

नयाँ व्यवस्थाअनुसार १० चक्कासम्मका सम्पूर्ण मालवाहक सवारीसाधन तथा ठुला यात्रुवाहक सवारीसाधनले काठमाडौं जाँदा अनिवार्य रूपमा त्रिभुवन राजपथ प्रयोग गर्नुपर्नेछ । फर्किने क्रममा भने कान्ति लोकपथ हुँदै हेटौँडा आउनुपर्ने व्यवस्था गरिएको छ ।

प्रशासनले मौसम र सडकको अवस्थालाई ध्यानमा राख्दै कान्ति लोकपथ हुँदै हेटौँडातर्फ आउने यात्रुवाहक सवारीसाधनले साँझ ६ बजेभित्र मकवानपुरको इलाका प्रहरी कार्यालय ठिंगन चेकपोस्ट पार गरिसक्नुपर्ने समयसीमा पनि तोकेको छ । साँझपछि पहिरो र दुर्घटनाको जोखिम बढ्ने भएकाले यस्तो व्यवस्था गरिएको प्रशासनले जनाएको छ ।

यस्तै, १४ सिटभन्दा कम क्षमताका साना यात्रुवाहक सवारीसाधनका लागि पनि छुट्टै मार्ग निर्धारण गरिएको छ । हेटौँडातर्फ आउँदा फर्पिङ-फाखेल-कुलेखानी हुँदै भीमफेदी प्रयोग गर्नुपर्नेछ भने काठमाडौंतर्फ जाँदा भीमफेदी-कुलेखानी-सिस्नेरी-दक्षिणकाली मार्ग प्रयोग गर्नुपर्ने व्यवस्था गरिएको छ।

अत्यावश्यक कामबाहेक यात्रा नगर्न सर्वसाधारणलाई आग्रह

प्रशासनले विपतजन्य अवस्था कायम रहेकाले अत्यावश्यक कामबाहेक यात्रा नगर्न पनि सर्वसाधारणलाई आग्रह गरेको छ । यात्रा गर्नै परे चालकहरूले धैर्यपूर्वक आफ्नो पालोअनुसार सवारी सञ्चालन गर्न, अनावश्यक ओभरटेक नगर्न तथा ट्राफिक प्रहरी र सुरक्षाकर्मीको निर्देशन पूर्ण रूपमा पालना गर्न अनुरोध गरिएको छ ।

जिल्ला प्रशासन कार्यालयले यातायात व्यवसायी, सवारीचालक तथा यात्रुलाई नयाँ व्यवस्थाको पूर्ण पालना गर्न आग्रह गर्दै यसबाट वैकल्पिक सडकमा बढ्दो सवारी चाप व्यवस्थापन, दुर्घटना न्यूनीकरण तथा यात्रुलाई सुरक्षित र सहज आवागमन सुनिश्चित गर्न सहयोग पुग्ने विश्वास व्यक्त गरेको छ ।

भदौ १० गते रसुवाको भोटेकोशीमा आएको विनाशकारी बाढीपछि धादिङको कृष्णभिर क्षेत्रमा पृथ्वी राजमार्ग भासिएर बन्द भएपछि काठमाडौंलाई देशका विभिन्न जिल्लासँग जोड्ने मुख्य सडक सम्पर्क अवरुद्ध बनेको छ ।

त्यसयता चितवन, पोखरा, बुटवल, बारा, पर्सा, रौतहट, सर्लाहीलगायत जिल्लाबाट राजधानी जाने अधिकांश सवारीसाधन हेटौँडा हुँदै सञ्चालन भइरहेका छन् । जसले मकवानपुरका वैकल्पिक सडकमा सवारी चाप बढेको छ ।