Skip This
जापानमा १०० वर्ष वा सोभन्दा माथिका उमेर समूहका मानिसहरूको संख्या लगभग एक लाख रहेको र यो एक रेकर्ड उच्चस्तरमा पुगेको त्यहाँको सरकारले घोषणा गरेको छ । स्वास्थ्य मन्त्रालयले सेप्टेम्बरसम्ममा जापानमा शताब्दी उमेर पुगेकाहरूको संख्या ९९,७६३ रहेको बताएको छ । ती कुल संख्यामध्ये, महिलाहरूको संख्या अत्यधिक ८८ प्रतिशत रहेको छ । जापानमा विश्वको सबैभन्दा लामो आयु छ, र प्राय: विश्वको सबैभन्दा वृद्ध जीवित व्यक्तिको घरको रूपमा परिचित छ । तथापि, केही अध्ययनले विश्वभर शताब्दी पुगेकाहरूको वास्तविक संख्यालाई चुनौती दिएको छ ।
यो सबैभन्दा छिटो वृद्ध हुने समाजमध्ये एक हो, जहाँ बासिन्दाहरूले प्राय: स्वस्थ आहार खाने गर्छन्, तर जन्मदर कम हुन्छ । जापानको सबैभन्दा वृद्ध व्यक्ति ११४ वर्षीया सिगेको कागावा हुन्, जो नारा सहरको उपनगर यामातोकोरियामाकी महिला हुन् । त्यस्तै, सबैभन्दा वृद्ध पुरुष १११ वर्षीय कियोताका मिजुनो हुन्, जो तटीय सहर इवाताका हुन् । स्वास्थ्यमन्त्री ताकामारो फुकोकाले ८७ हजार ७८४ महिला र ११ हजार ९७९ शताब्दी वर्षका पुरुषलाई उनीहरूको दीर्घायुका लागि बधाई दिए । उनले ‘समाजको विकासमा उनीहरूको धेरै वर्षको योगदानको लागि कृतज्ञता’ व्यक्त गरे । सेप्टेम्बर १५ मा जापानको वृद्धाश्रम दिवसको पूर्वसन्ध्यामा यी तथ्यांक जारी गरिएको थियो । यस दिनलाई राष्ट्रिय दिवसको रूपमा मनाइन्छ, जहाँ नयाँ शताब्दी पुरुषले व्यक्तिहरूले प्रधानमन्त्रीबाट बधाईपत्र र चाँदीको कप प्राप्त गर्छन् । यस वर्ष ५२ हजार ३१० व्यक्ति यस्तो कदरका लागि योग्य रहेका स्वास्थ्य मन्त्रालयले जनाएको छ ।
१९६० को दशकमा जापानको जनसंख्यामा जी–७ देशहरूको तुलनामा १०० वर्षभन्दा माथिका मानिसहरूको अनुपात सबैभन्दा कम थियो । तर, त्यसपछिका दशकहरूमा यो उल्लेखनीय रूपमा परिवर्तन भएको छ । जब जापान सरकारले १९६३ मा शताब्दी सर्वेक्षण सुरु गर्यो, त्यहाँ १०० वर्ष वा सोभन्दा माथिका १५३ जना थिए । त्यो संख्या १९८१ मा एक हजार पुगेको थियो र १९९८ सम्ममा १० हजार पुगेको थियो । जापानमा मोटोपनको दर कम छ, जुन स्तन र प्रोस्टेट क्यान्सर दुवै रोगहरूको प्रमुख कारक हो । महिलाहरूका लागि मोटोपनदर विशेष गरी कम छ, जसका कारण जापानी महिलाहरूको आयु उनीहरूका पुरुष समकक्षीहरूको तुलनामा धेरै उच्च छ । विश्वको बाँकी भागमा आहारमा चिनी र नुनको मात्रा बढ्दै जाँदा जापान अर्को दिशामा बढेको छ । सार्वजनिक स्वास्थ्य सन्देशले मानिसहरूलाई आफ्नो नुनको खपत कम गर्न सहयोग गर्यो ।
आहार मात्र उनीहरूको दीर्घजीवीको राज होइन । जापानीहरू जीवनको उत्तराद्र्धमा पनि सक्रिय रहन्छन् । उनीहरू अमेरिका र युरोपका वृद्धवृद्धाभन्दा बढी हिँड्छन् र सार्वजनिक यातायात प्रयोग गर्छन् । दैनिक सामूहिक व्यायाम १९२८ देखि जापानी संस्कृतिको एक हिस्सा भएको छ, जुन समुदाय र जनस्वास्थ्यको भावनालाई प्रोत्साहित गर्न स्थापित भएको थियो । तीन मिनेटको दिनचर्या टेलिभिजनमा प्रसारित हुन्छ र देशभरका साना सामुदायिक समूहमा अभ्यास गरिन्छ । यद्यपि, धेरै अध्ययनहरूले विश्वव्यापी शताब्दी संख्याहरूको वैधतामा शंका व्यक्त गरेका छन्, जसले डेटा त्रुटि, अविश्वसनीय सार्वजनिक रेकर्ड र हराएको जन्म प्रमाणपत्र उच्च तथ्यांकका लागि जिम्मेवार छन् । २०१० मा जापानमा पारिवारिक दर्ताहरूको सरकारी लेखापरीक्षणले १०० वर्ष वा सोभन्दा माथिका रूपमा सूचीबद्ध दुई लाख ३० हजारभन्दा बढी व्यक्ति पत्ता लगाएको थियो जसमध्ये केहीको मृत्यु दसकौँअघि भएको थियो । स्वास्थ्यसम्बन्धी सचेतना, उचित खानपान, शिक्षालगायतका कारण जापानमा पाका मानिसहरूको संख्या निरन्तर बढिरहेको छ ।
