तेस्रो नेपाल सुपर लिग : विवादास्पद खेलमा ललितपुरको जित

कप्तान नवयुग श्रेष्ठको गोललाई मान्यता नदिँदा पोखराका प्रतिनिधि सुरक्षा घेरा तोड्दै मैदानमा प्रवेश गरेपछि खेल १० मिनेट रोकियो  

तेस्रो नेपाल सुपर लिग (एनएसएल)मा साबिक विजेता ललितपुर सिटी एफसीले बुधबार दशरथ रंगशालामा पोखरा थन्डर्सलाई विवादास्पद खेलमा ३–२ ले हराएको छ । ललितपुरको जितमा जोनाथन जोरिल्लाले दुई तथा इमोह इजेकेलले एक गोल गरेका थिए । पोखराका लागि मार्की खेलाडी समीर तामाङ र विदेशी खेलाडी जोई आइडुले गोल फर्काए । खेलको ८२औँ मिनेटमा रेफ्री र पोखराका अफिसियलबिच विवाद भएको थियो । स्थिति नियन्त्रणमा लिन आयोजकले सुरक्षाकर्मीको सहयोग लिनुपर्‍यो । 

पोखराका समीरको पासमा कप्तान नवयुग श्रेष्ठको प्रहार लतिलपुरका गोलरक्षक जेफेरी विली बाल्टुसले गोललाइनबाट बचाएका थिए । फिफा रेफ्री नवीन्द्र महर्जनले सहायक रेफ्री किशन कन्हैया यादवको इसारामा गोल दिएनन् । पोखराका अफिसियलले नवयुगले प्रहार गरेको बल गोललाइन पार गरेको दाबी गरेका थिए । अफिसियलले उनीहरूको अपिल सुनेनन् । जसकारण प्राविधिक क्षेत्र तनावग्रस्त भयो । यसैबिच अप्रत्याशित रूपमा पोखराका प्रतिनिधि सुन्दर थापा मैदान प्रवेश गरी आयोजक र अफिसियलसँग विवाद गर्न पुगेका थिए । थापा आधिकारिक रूपमा पोखराका अफिसियल भने थिएनन् । अफिसियलका रूपमा उनले ‘एफओबी’ लगाउनुपर्ने थियो । पोखराको प्लेइङ लिस्टमा थापाको नाम समावेश थिएन । पोखराका एक सामान्य पदाधिकारीका रूपमा मैदानभित्र प्रवेश गरेकाले उनलाई रेफ्रीले रातो कार्डसमेत देखाएनन् । 

थापा पोखराको मालिक बस्ने प्यारपिटमा बसेका थिए । रेफ्रीले गोल नदिँदा उनी सीधै टनेलबाट मैदानभित्र प्रवेश गरी सहायक रेफ्री किसनसँग विवादमा उत्रिएका हुन् । उनलाई फोर्थ रेफ्री उमेश बिडारीले रोक्ने कोसिस नगरेका होइनन् । विवाद सुल्झाउन पुगेका अखिल नेपाल फुटबल संघ (एन्फा) प्रतियोगिता निर्देशक सञ्जीव मिश्रलाई समेत थापाले तानेर भुइँमा लडाए । त्यसपछि मात्र सुरक्षाकर्मी आएको थियो । ‘उहाँले एक्कासि मैदानमा प्रवेश गरेर अपशब्द प्रयोग गर्नुभयो,’ अफिसियलले भने । ललितपुर सिटीका प्रशिक्षक सिमोन निकोलास ग्रेसन खेलका क्रममा यस्तो घटना भइरहने र यसलाई सामान्य रूपमा लिने बताए । पोखराका प्रशिक्षक सुमन श्रेष्ठले गोल नै भएको दाबी गरे ।

रंगशालाको सुरक्षामा प्रश्न 
खेल सुरु भएपछि रंगशालाको सिन्थेटिक ट्र्याकलगायत अन्य क्षेत्रमा आधिकारिक व्यक्तिबाहेक अन्य कोही पनि हिँडडुल गर्न मिल्दैन । अझ त्यसमा पनि निश्चित क्षेत्रसम्म जान पाउने र जान नपाउने भनी मार्किङ गरिएको हुन्छ । यस्तो अवस्थामा खेलको ८२औँ मिनेटमा थापा एक्कासि प्यारापिटबाट मैदानसम्म पुग्नु सुरक्षा व्यवस्थाको कमजोरी प्रस्ट देखिन्छ । उनी बाक्लो सुरक्षा घेरा तोड्दै ट्र्याकमा पुग्दा कसैले रोक्न सकेनन् । 

उनले सुरक्षाकर्मीलाई धम्की दिएरै मैदान प्रवेश गरेका हुन् । ‘उहाँसँग एफओबी पनि थिएन । कसरी सुरक्षाकर्मीले मैदानमा पठाए, यो गम्भीर विषय हो,’ एक अधिकारीले भने, ‘यदि रेफ्रीमाथि हातपात भएको भए यसको जिम्मेवारी कसले लिने ?’ ती अधिकारीले भने । नयाँ पत्रिकासँग कुराकानी गर्दै थापाले भने, ‘श्रम स्वीकृति नपाएको खेलाडी खेलाउनु र म पनि मैदान प्रवेश गर्नु उस्तै हो ।’ 

दुई खेलमा जोनाथनको तीन गोल 
ललितपुरका जोनाथनले दुई खेलमा तीन गोल संख्या पुर्‍याएका छन् । तीन गोलका साथ उनी सर्वाधिक गोलकर्ता सूचीको शीर्ष स्थानमा छन् । उनले उद्घाटन खेलमा काठमाडौं रेजर्सविरुद्ध गोल गरेका थिए । 

पोखराविरुद्ध ११औँ मिनेटमा जोनाथनले अग्रता गोल गरेका थिए । खेलको ४२औँ मिनेटमा पोखराका समीरले १–१ को बराबरी गोल फर्काए । पोखराका कप्तान नवयुगको हेडिङलाई ललितपुरका गोलरक्षक बाल्टुसले बचाएका थिए । तर, रिबाउन्डमा आएको बललाई समीरले वान टचमै गोल गरे । पहिलो हाफको इन्जुरी समयमा इजेकेलले ललितपुरलाई २–१ को अग्रता दिलाए । खेलको ७५औँ मिनेटमा जोनाथनले ललितपुरको अग्रतालाई ३–१ मा राखे । इन्जुरी समयमा जोए आइडुले पोखरालाई ३–२ को गोलअन्तरमा झारे । 

रेफ्रीको निर्णय चित्त बुझेन : सुमन श्रेष्ठ, प्रशिक्षक, पोखरा थन्डर्स
ललितपुरविरुद्ध सोचेजस्तो नतिजा आएन । हामीले लगातार दुई खेलमा राम्रो गर्न सकेनौँ । पहिलोभन्दा दोस्रो खेल राम्रो थियो । एनएसएलको खेल तालिका हुँदैभएन । यहाँ लगातार खेल्दा गाह्रो छ । यति राम्रो प्रतियोगिता हुँदा रेफ्री त्यसअनुसारका भएनन् । प्रतियोगितामा रेफ्रीको सानो गल्तीले एक–दुई करोड लगानी डुब्छ । त्यो क्लियर गोल थियो । यसकारण सुरुमा अपिल नगरेका हौँ । 

लक्ष्य हरेक खेल जित्ने हो : अनन्त तामाङ, कप्तान, ललितपुर सिटी
पोखराविरुद्ध २–१ को अग्रता लिएपछि रक्षात्मक रणनीति अपनायौँ । हामीले दुई खेलमा चार गोल व्यहोरेका छौँ । यो राम्रो होइन । ललितपुरले बाँकी खेलमा केन्द्रित हुनुपर्छ । हाम्रो लक्ष्य हरेक खेल जित्ने हो । जित्न नसके बराबरी गर्ने हो । आगामी दिनमा राम्रो नतिजा निकाल्न सुधार गर्नुपर्छ । भिएआर भएको भए गोल हो वा होइन प्रस्ट हुन्थ्यो । रेफ्रीलाई पनि निर्णय गर्न गाह्रो थियो । गोल दिएको भए पनि हामी पनि अपिलमा जान्थ्यौँ । खेल तालिका पनि राम्रो छैन ।