- वि.सं २o८१ चैत २१ बिहीबार
जोस बटलरको उत्कृष्ट ब्याटिङ इनिङ्सको सहयोगमा गुजरात टाइटन्सले बुधबार रोयल च्यालेन्जर्स बेंग्लोरमाथि आठ विकेटको सानदार जित निकालेको छ । घरेलु मैदानमा पहिलो ब्याटिङ गरेको बेंग्लोरले २० ओभरमा आठ विकेट गुमाएर १६९ रन बनाएको थियो । प्रत्युत्तरमा गुजरातले १७.५ ओभरमा दुई विकेटको क्षतिमा १७० रन बनायो । नटआउट रहेका बटलरले ३९ बलमा ६ छक्का र पाँच चौका प्रहार गरी ७३ रन बटुले । गुजरात ४ अंकका साथ चौथो स्थानमा छ ।
लक्ष्य पछ्याएको इनिङ्समा गुजरातका लागि ओपनर साई सुदर्शनले ३६ बलमा सात चौका र एक छक्का प्रहार गरी ४९ रन बनाए । कप्तान सुभमन गिल १४ रनमा आउट भए । बटलर र सुदर्शनले दोस्रो विकेटका लागि ७५ रनको साझेदारी गरेका थिए । बटलर र सेर्फान रुथफोर्डले तेस्रो विकेटका लागि अविजित ७० रनको साझेदारी गर्दै गुजरातलाई सानदार जित दिलाए । सेर्फानले १८ बलमा ३० रन जोडे । यसअघि ब्याटिङ गरेको बेंग्लोरको शीर्ष क्रम चल्न सकेन ।
मध्यक्रमका ब्याट्सम्यानले गतिलो ब्याटिङ गरेपछि बेंग्लोरले मध्यम योगफल खडा गरेको हो । ओपनर फिल साल्ट १४, विराट कोहली ७ तथा देवदत्त ४ रनमा पेभेलियन फर्कंदा बेंग्लोर ३५–३ को अवस्थामा पुगेको थियो । त्यसपछि लिआम लिभिङस्टोन र जितेश शर्माले गतिलो साझेदारी गरे । लिआमले ४० बलमा पाँच छक्का र एक चौका प्रहार गरी सर्वाधिक ५४ रनको योगदान दिए ।
जितेशले २१ बलमा पाँच चौका र एक छक्काको सहयोगमा ३३ रन जोडे । टिम डेभिडले १८ बलमा तीन चौका र दुई छक्काको सहयोगमा ३२ रन बनाए ।
