- वि.सं २o८१ चैत २० बुधबार
गण्डकी प्रदेशका सामाजिक विकास, युवा तथा खेलकुदमन्त्री विन्दुकुमार थापाले आफूले पाएको सम्पूर्ण सेवा-सुविधाहरू सामाजिक कामका लागि खर्च गरेका छन्। मन्त्री थापाले अघिल्लो र हालको कार्यकालमा गरी सात वर्षको अवधिमा राज्यबाट पाएको सम्पूर्ण सेवा सुविधा सामाजिक काममा खर्च गरेको मंगलबार पोखरामा आयोजित नेपाल प्रेस युनियन कास्कीको पत्रकार सम्मेलनका क्रममा जानकारी दिए।
०७४ र ०७९ सालमा भएको दुवै निर्वाचनमा नेपाली कांग्रेसका तर्फबाट कास्की क्षेत्र नम्बर २ प्रदेश सभा (ख)बाट प्रत्यक्षतर्फ निर्वाचित प्रदेश सभा सदस्य थापा हाल गण्डकीको सामाजिक विकास, युवा तथा खेलकुदमन्त्री छन् भने अघिल्लो कार्यकालमा कानुन, सञ्चार तथा प्रदेश मामिलामन्त्री थिए।
पत्रकार सम्मेलनमा थापाले ०७४ माघदेखि ०८१ फागुनसम्म तलब, भत्तालगायतका सुविधाबापत राज्यबाट ५८ लाख ५७ हजार पाएकोमा त्यसमा व्यक्तिगत २० लाख ८५ हजार थप गरी कुल ७९ लाख ४२ हजार रुपैयाँ विभिन्न सामाजिक कार्यमा खर्च गरेको बताए। उनी प्रदेश सरकारबाट प्राप्त निवासको सुविधासमेत नलिई निजीनिवासमा बस्दै आएका छन्। अटो, घर, जग्गा, व्यापारिक मल, बैंक तथा वित्तीय संस्थालगायतको व्यवसायमा आबद्ध थापा पोखरा उद्योग वाणिज्य संघका पूर्वअध्यक्षसमेत हुन्।
०७९ मंसिरको चुनावबाट निर्वाचित भएपछि २५ पुस ०७९ देखी माघ ०८० सम्म प्रदेश सभाबाट मासिक पारिश्रमिक, बैठक भत्तालगायतका शिर्षकबाट आठ लाख ९६ हजार प्राप्त गरेकोमा व्यक्तिगत रुपमा दुई लाख १६ हजार थप गरी ११ लाख १२ हजार रुपैयाँ सामाजिक काममा खर्च गरेका थिए। त्यसपछि ०८० फागुनदेखि ०८१ फागुनसम्म मासिक पारिश्रमिक, बैठक भत्तालगायतका शीर्षकबाट नौ लाख ९० हजार रुपैयाँ पाएकोमा त्यसमा ११ हजार थप गरी पछिल्लो एक वर्षमा १० लाख एक हजार रुपैयाँ खर्च गरेको मन्त्री थापाले जानकारी दिए।
यसअघि उनले अघिल्लो कार्यकालमा माघ २०७४ देखि ७ साउन ०७८ सम्म प्रदेश सभा सदस्यवापत र ८ साउन ०७८ देखि ०७९ पुस तेस्रो सातासम्म मन्त्रीबापत बैठक भत्तादेखि मासिक पारिश्रमिक र अन्य सेवासुविधा सम्पूर्ण गरी राज्यबाट ४० लाख ७१ हजार प्राप्त गरेका थिए। अघिल्लो कार्यकालको करिब पाँच वर्षको अवधिमा आफूले पाएको रकममा व्यक्तिगत रूपमा १७ लाख ७५ हजार थप गरी ५८ लाख २९ हजार ६६ रुपैयाँ सामाजिक काममा खर्च गरेको थापाले बताए।
थापाले क्यान्सर, मुटुरोग, पानी ट्यांकीसँगै खानेपानी आयोजना, सडक, सडकमा अटोमेटिक बत्ती जडान एवं मर्मत, जेहेन्दार विद्यार्थीलाई छात्रवृत्ति, छात्रवृत्ति कोष स्थापना, तालिम, खेलकुद प्रतियोगिता, विभिन्न संघ संस्था र समुदायका सामाजिक भवन निर्माण, विभिन्न संघ संस्थाको कार्यालका लागि आवश्यक फर्निचर र अन्य सामग्री, आर्थिक सहयोग, आर्थिक अवस्था कम्जोर भएका विरामीहरुको उपचारमा सहयोग, चौतारो निमार्ण, बाटो निमार्ण, मुटु शिविर, बाढी पहिरोबाट क्षति भएको घर मर्मतलगायतका काममा सो रकम खर्च गरेको जानकारी दिए।
आफूले अघिल्लो कार्यकालमा उम्मेदवारी दिने क्रममा पाएको सेवा सुविधा जनसेवामै खर्च गर्ने घोषणा गरेको र हाल पनि त्यसलाई निरन्तरता दिएको उनको भनाइ छ। सरकारले ठुला आयोजनाहरु कार्यान्वयन गर्दा कतिपय छुटेका साना तर महत्वपूर्ण विषयहरूको सम्बोधन गर्न आफूले प्रयास गर्दै आएको उनले बताए।
