बागमती प्रदेश सभाको सचिवमा पौडेल नियुक्त

बागमती प्रदेश सभाको सचिवमा रामकुमार पौडेल नियुक्त भएका छन्। बुधबार प्रदेश प्रमुख दीपकप्रसाद देवकोटाले प्रदेश सभाको सचिवमा पौडेललाई नियुक्त गरेका हुन्।

प्रदेश सभाका सभामुख भुवनकुमार पाठकको सिफारिसमा प्रदेश प्रमुख देवकोटाले पौडेललाई नेपालको संविधानको धारा १९५ को उपधारा (१) अनुसार प्रदेश सभाको सचिवमा नियुक्त गरेका हुन्।

नियुक्तिसँगै सचिव पौडेलले बुधबार नै पद तथा गोपनीयताको शपथग्रहणसमेत गरेका छन्। उनलाई प्रदेश सभाका सभामुख पाठकले पद तथा गोपनीयताको शपथग्रहण गराएका हुन्। पौडेलले बुधबार नै पदभारसमेत ग्रहण गरेका छन्।

यसअघि पौडेल संघीय संसद्को प्रतिनिधिसभा सचिवालयमा सहसचिव पदमा कार्यरत थिए। उनले उक्त पदबाट १७ चैतमा राजीनामा दिएका थिए। राजीनामा स्वीकृत भएसँगै पौडेललाई बागमती प्रदेश सभाको सचिवमा नियुक्त हुन बाटो खुलेको थियो। संघीय संसदमा १७ वर्ष सेवा गरेका उनलाई प्रदेश सभाको ५ वर्ष अवधिका लागि नियुक्त गरिएको हो।