लुम्बिनीको बजेट २० प्रतिशत खुम्चिने : आगामी आवमा ३२–३३ अर्बको बजेट ल्याउने तयारी

लुम्बिनी प्रदेश सरकारले आगामी आर्थिक वर्षका लागि बजेटको आकार घटाउने भएको छ । चालू आर्थिक वर्ष ०८१/८२ का लागि ३८ अर्ब ९७ करोडको बजेट ल्याएको प्रदेश सरकारले आगामी आवमा घटाउने तयारी गरेको मुख्यमन्त्री चेतनारायण आचार्यले जानकारी दिए ।

प्रदेश विकास समस्या समाधान समितिको मंगलबारको बैठकमा मुख्यमन्त्री आचार्यले बजेटको आकार घट्नेबारे स्पष्ट पार्दै आगामी आर्थिक वर्षका लागि प्रदेश सरकारले घाटा बजेट नबनाउने बताए । सोहीअनुसार तयारी गर्न मातहतका निकायलाई उनले निर्देशन पनि दिएका छन् । ‘आउँदो वर्षको बजेट घाटा बजेट हुनेछैन । ३२–३३ अर्बको हाराहारीमा बजेट आउँछ,’ उनले भने, ‘वास्तविक धरातलमा उभिएर बजेट बनाउनुपर्छ । प्रदेश सरकारलाई लयमा हिँडाउन जिम्मेवार भएर सरकार अघि बढ्छ ।’

प्रदेश सरकारले जनताको मन छुने योजना बजेटमा समेटिने र त्यसका लागि गृहकार्यमा जुट्न उनले निर्देशन दिए । ‘जनतामा निराशा होइन, आशा जगाउने खालका योजना ल्याउन जरुरी छ । मन छुने योजना समेट्न आवश्यक छ,’ उनले भने, ‘प्रदेश स्थापना भएपछि अघिको अवस्था कस्तो थियो र अहिलेको अवस्था के छ ? भन्नेबारे समेत तुलना गरेर योजना अघि सार्न जरुरी छ ।’ बैठकमा भौतिक पूर्वाधार विकासमन्त्री भूमीश्वर ढकालले व्यक्ति योजना माग्न आउने प्रवृत्तिको अन्त्य गर्ने र प्रणालीलाई चुस्त बनाउनुपर्ने बताए । प्रदेश स्थापना भएपछि कार्यान्वयन भएका योजनाहरूको पहिचान गर्न जरुरी रहेको उनले बताए ।

कृषि, भूमि व्यवस्था तथा सहकारीमन्त्री दिनेश पन्थीले जनताको भावनालाई सम्बोधन गर्ने गरी कामको गतिलाई बढाउन जरुरी रहेको बताए । आर्थिक मामिला तथा योजनामन्त्री धनेन्द्र कार्की, वन तथा वातावरणमन्त्री देवकरण कलवार, प्रमुख सचिव बाबुराम अधिकारीलगायत मन्त्रालयका सचिव तथा विभिन्न क्षेत्रका विज्ञहरूले सुझावसहितको धारणा राखेका थिए । योजना आयोगका उपाध्यक्ष डा. डिल्लीराज अर्यालले प्रदेश विकास समस्या समाधान समितिको बैठकमा चालू आर्थिक वर्षको हालसम्मको अवस्था, उपलब्धि र आगामी योजनासहितको विषय प्रस्तुत गरेका थिए ।