- वि.सं २o८१ चैत २० बुधबार
थाइल्यान्डको औपचारिक भ्रमणमा रहेका प्रधानमन्त्री केपी ओली र उनका थाई समकक्षी पेथोङ थान शिनावात्राबिच आज भेटवार्ता हुँदै छ। थाइल्यान्डको सरकारी भवनमा भेटवार्ताअघि प्रधानमन्त्री ओली समकक्षी शिनावात्राले आयोजना गरेकाे स्वागत समारोहमा सहभागी भए ।
थाइल्यान्डका प्रधानमन्त्री शिनावातत्राको मैत्रीपूर्ण निमन्त्रणामा नेपालका प्रधानमन्त्रीबाट पहिलोपटक थाइल्यान्डको औपचारिक भ्रमण भएको हो। यो भ्रमणबाट दुई देशबिचको आपसी सम्बन्ध विस्तार र सहकार्यमा योगदान पुग्ने अपेक्षा गरिएको छ। परराष्ट्र मन्त्रालयका अनुसार भेटवार्तापछि संस्कृति र पर्यटनका क्षेत्रमा सहकार्यसम्बन्धी सम्झौतापत्रमा हस्ताक्षर हुनेछ। यसैगरी दुई देशबिचका गैरसरकारी र व्यावसायिक संस्थाबिच विभिन्न ६ सहमतिपत्र आदान–प्रदान हुनेछ।
सम्झौतापछि दुवै प्रधानमन्त्रीले संयुक्त पत्रकार सम्मेलन गर्ने कार्यक्रम छ। त्यसपछि प्रधानमन्त्री ओली आफ्नो सम्मानमा समकक्षी शिनावात्राले आयोजना गरेकाे दिवाभोजमा सहभागी हुनेछन् । प्रधानन्त्री ओलीले आजै थाइल्यान्डका राजा महाबजिरालोङकर्नसँग शिष्टाचार भेट गर्ने कार्यक्रम छ।
थाइल्यान्डको औपचारिक भ्रमणका क्रममा प्रधानमन्त्री ओली मंगलबार अपराह्न यहाँ आइपुगेका हुन्।
