- वि.सं २o८१ चैत १ शुक्रबार
अमेरिकी राष्ट्रपति डोनाल्ड ट्रम्पले शुक्रबार रुसी समकक्षी भ्लादिमिर पुटिनसँग फ्रन्टलाइनमा रहेका युक्रेनी सैनिकहरूको ज्यान बचाउन आग्रह गरेका छन्। उनले मस्कोमा भएको वार्तालाई ‘धेरै राम्रो र फलदायी’ युद्धविराम छलफल भएको बताएका छन्।
तीन वर्षको युद्धपछि रुस र युक्रेनबिच ३० दिने युद्धविरामको योजनाबारे छलफल गर्न उनका विशेष दूतले मस्कोमा पुटिनसँग वार्ता गरेपछि ट्रम्पको यो टिप्पणी आएको हो ।
‘हामीले हिजो रुसका राष्ट्रपति भ्लादिमिर पुटिनसँग धेरै राम्रो र उत्पादक छलफलहरू गर्यौँ र यो भयावह, रक्तपातपूर्ण युद्ध अन्त्यमा समाप्त हुन सक्ने धेरै राम्रो सम्भावना छ,’ ट्रम्पले आफ्नो ट्रुथ सोसल नेटवर्कमा भनेका छन्।
ह्वाइट हाउसका प्रेससचिव क्यारोलिन लेभिटले पछि पत्रकारहरूलाई स्पष्ट पार्दै ट्रम्प आफैँले बिहीबार राति पुटिनसँग कुरा नगरेको बताइन् । शुक्रबार कुनै कल निर्धारित नभएको उल्लेख गर्दै ‘तर त्यो स्पष्ट रूपमा परिवर्तन हुन सक्ने’ बताइन्।
गत हप्ता ट्रम्पले आफू कार्यालयमा फर्किएपछि फेब्रुअरीमा आधिकारिक रूपमा घोषणा गरिएको फोनवार्ताबाहेक पुटिनसँग ‘धेरैपटक’ कुरा गरेको बताएका थिए । आधिकारिक फोनवार्ताले वर्तमान युद्धविराम प्रयासलाई अघि बढाएको हो ।
शुक्रबार आफ्नो पोस्टमा ट्रम्पले पुटिनलाई ‘हजारौँ’ युक्रेनी सैनिक ‘पूर्ण रूपमा रुसी सेनाले घेरिएको, र धेरै खराब र कमजोर स्थितिमा रहेको’ भन्दै एउटा असामान्य अपिल पनि जारी गरेका हुन्। किएभले तुरुन्तै ट्रम्पको दाबीलाई अस्वीकार गर्यो ।
‘मैले राष्ट्रपति पुटिनलाई उनीहरूको ज्यान बचाउन आग्रह गरेको छु । यो दोस्रो विश्वयुद्धपछि कहिल्यै नदेखेको एउटा भयानक नरसंहार हुनेछ । भगवानले ती सबैलाई आशीर्वाद दिनुहोसु !!!’ ट्रम्पले लेखेका छन्।
मस्कोले गत हप्ता युक्रेनको धेरैजसो सेनालाई रुसको कुर्क्स क्षेत्रबाट बाहिर निकाल्दै आएको छ । कुर्क्सको केही भाग किएभले गत वर्ष कब्जा गरेको थियो ।
सन् २०१४ मा क्रिमिया कब्जा गरेर सन् २०२२ फेब्रुअरीमा पूर्ण आक्रमण सुरु गरेदेखि युक्रेनको करिब पाँचौँ भाग ओगटेको रुससँग भूमि साटासाट गर्न कुर्क्स किएभको केही मोलतोल गर्ने चिप्सहरूमध्ये एक थियो ।
पुटिनले ट्रम्पलाई युद्धविरामबारे ‘थप’ संकेत पठाएको र सम्झौताको सम्भावनाबारे ‘सावधानीपूर्वक आशावादी’ रहेको बताएको रुसले शुक्रबार भनेको थियो ।
अमेरिकी दूत स्टिभ विट्कफले संयुक्त अमेरिकी–युक्रेनी योजनाको विवरणहरू प्रस्तुत गर्न बिहीबार राति पुटिनसँग भेट गरेका थिए ।
क्रेमलिनले ट्रम्प र पुटिनबिच ‘कुराकानी आवश्यक छ’ भन्ने कुरामा दुवै पक्ष सहमत भएको, तर समय निर्धारण हुन बाँकी रहेको बताएको छ ।
पुटिनले बिहीबार आयोजित पत्रकार सम्मेलनमा युक्रेनसँग ३० दिने युद्धविरामका लागि सर्त राखेका थिए। उनले दीर्घकालीन शान्तिको सुनिश्चितता हुनुपर्ने र युद्धको कारण खोजेर त्यसको समाधान हुनुपर्ने बताएका थिए।
अमेरिकाले दुवै देशलाई ३० दिने युद्धविरामका लागि आग्रह गरेको छ। जसमा युक्रेन सहमत भएको छ भने पुटिनले त्यसमा आफू सकारात्मक भए पनि सर्त राखेका छन्।
