खोटाङमा पहिलाेपटक राष्ट्रिय बाँस सम्मेलन आयोजना हुँदै

खोटाङको दिक्तेल रुपाकोट मझुवागढी नगरपालिकाले आगामी फागुनमा आयोजना गर्न लागेको ‘प्रथम राष्ट्रिय बाँस सम्मेलन–२०८१’लाई प्रभावकारी बनाउन प्रदेशस्तरीय कार्यक्रम तय गरिएको छ। बाँसको उपयोगिता, सम्भाव्यता, प्रभावकारिता र बजारीकरणका लागि फागुन १५ देखि १७ गतेसम्म दिक्तेल बजारस्थित माटिकोरे खेलमैदानमा आयोजना गर्न लागिएको राष्ट्रिय बाँस सम्मेलनलाई प्रभावकारी बनाउन प्रदेशस्तरीय कार्यक्रम तय गरिएको हो।

कोशी प्रदेशमा पुस १४ गते, मधेश प्रदेशमा पुस १५ गते, बागमती प्रदेशमा पुस १६ गते र गण्डकी प्रदेशमा पुस १७ गते प्रदेशस्तरीय कार्यक्रम गर्ने तयारी गरिएको नगरप्रमुख तीर्थराज भट्टराईले जानकारी दिए। ‘नेपालको ईतिहासमा पहिलोपटक दिक्तेल बजारमा राष्ट्रिय बाँस सम्मेलन गर्न लागिएको छ। सम्मेलनमा देश÷विदेशका बाँसविज्ञ तथा व्यवसायीहरु सहभागी हुन्छन्’, उनले भने, ‘तीन दिनसम्म सञ्चालन हुने राष्ट्रिय बाँस सम्मेलनलाई प्रभावकारी बनाउन प्रदेशस्थरीय कार्यक्रम बनाएका छौँ। छुटेका प्रदेशमा जुम प्रविधिबाट कार्यक्रम सञ्चालन गर्ने तयारी गरिएको छ।’

नगरप्रमुख भट्टराईको अध्यक्षतामा हुने प्रदेशस्तरीय कार्यक्रमअन्तर्गत कोशी प्रदेशमा सहारा नेपाल, मधेश प्रदेशमा डिभिजन वन कार्यालय र धनुषाधाम जनकपुर तथा बागमती र गण्डकी प्रदेशमा अर्थ मन्त्रालयको व्यवस्थापन र संयोजनमा कार्यक्रम हुने जनाइएको छ। प्रदेशस्तरीय कार्यक्रममा बाँस विज्ञ, सरोकारवाला, सरकारी तथा गैरसरकारी निकाय, शैक्षिक संघसंस्था तथा बाँसको क्षेत्रमा काम गरिरहेका व्यापारी, व्यवसायी र काम गर्ने व्यक्तिहरुको सल्लाह, सुझाव र चुनौतिहरु सुनेर योजना बनाइने नगरप्रमुख भट्टराईले पत्रकार सम्मेलनमार्फत जानकारी गराएर

जिल्लाको प्रमुख व्यापारिक केन्द्र दिक्तेल बजारमा आयोजना गर्न लागिएको बाँस सम्मेलनका लागि नगरपालिकाले रु पाँच लाख बजेटसमेत व्यवस्थापन गरेको छ। बाँस क्षेत्रमा काम गर्ने विभिन्न संघसंस्थाहरुले रु ४२ लाख बराबरको सम्मेलनलाई आवश्यक पर्ने जिन्सी सामाग्रीहरु उपलब्ध गराउने निमित्त प्रमुख प्रशासकीय अधिकृत राजकुमार राईले बताए।

सम्मेलनमा स्टल राख्न १५ जिल्लाबाट प्रस्ताव आइसकेको जनाइएको छ। सम्मेलनाई सरकारी तथा गैरसरकारी निकायका १०० जना, वन उपभोक्ता समूहका १०० जना, विश्वविद्यालय तथा अनुसन्धान केन्द्रका ५० जनासहित हजारौँ विद्यार्थीले अवलोकन गर्ने अनुमान गरिएको नगर उपप्रमुख विशन राईले जानकारी दिए।

सम्मेलनलाई प्रभावकारी बनाउन तथा स्टल राख्न नगरपालिकाका १५ वटै वडाबाट बाँससम्बन्धी व्यवसाय सञ्चालन गरिरहेकाहरुलाई हेटौँडाबाट झिकाइएका बाँसविज्ञ चन्द्रबहादुर थिङले नेर्पामा तालिम दिइरहेका छन्। तालिमसँगै सहभागीहरुले सम्मेलनमा राख्न बाँसबाट विभिन्न प्रकारका सामाग्रीहरुसमेत तयार गर्ने जनाइएको छ।

राष्ट्रिय बाँस सम्मेलनमा अनुमानित रु ४७ लाख बराबरको खर्च हुने अनुमान गरिएको नगरपालिकाले जनाएको छ। नगरपालिका, वन अनुसन्धान तथा प्रशिक्षण केन्द्र बबरमहल, पर्यटन वन तथा वातावरण मन्त्रालय कोसी प्रदेश र ग्रिन बेम्बो क्रियसन ललितपुरको संयुक्त आयोजनामा सम्मेलन गर्न लागिएको हो।

‘जहाँ बाँस त्यहाँ जीवन, जहाँ जीवन त्यहाँ बाँस’ भन्ने मूल नाराका साथ आयोजना गर्न लागिएको सम्मलेलनका लागि वन, वातावरण तथा प्रविधि मन्त्रालयका पूर्वमन्त्री गणेश साहको संयोजकत्वमा समिति गठन गरिएको छ। बाँसको क्षेत्रमा काम गर्दै आएका राष्ट्रिय बाँस अनुसन्धान तथा प्रवद्र्धन केन्द्रका अध्यक्ष के.पि. भट्टराईको पहलमा गत जेठमा काठमाडौँमा भएको सरोकारवाला व्यक्तिहरुको भेलाले दिक्तेल बजारमा पहिलोपटक राष्ट्रिय बाँस सम्मेलन गर्ने निर्णय गरेको थियो।

जिल्लाको सबैभन्दा ठूलो स्थानीय तह दिक्तेल रुपाकोट मझुवागढी नगरपालिकामा अत्याधिक मात्रामा ढुङ्ग्रे र भालु बाँससहित चोया, वन, करौती, मालिङ्गो, सिँगानो, निगाँलो, मुक्तियालीलगायत १३ किसिमका बाँस पाइन्छ।