नाफिजमा नयाँ कार्य समिति

नेपाल आर्थिक पत्रकार संघ (नाफिज) को नयाँ कार्य समिति चयन भएको छ । शनिबार सम्पन्न नाफिजको १५औं वार्षिक साधारण सभा तथा सातौं महासभा (निर्वाचन) ले मेनुका कार्कीको अध्यक्षतामा नयाँ कार्यसमिति चयन गरेको हो ।

कार्कीले एक सय मत पाउँदा उनका प्रत्यासी ईन्द्र बानियाँले ८७ मत प्राप्त गरेका थिए । कार्की यसअघि नाफिजको उपाध्यक्ष रहेकी थिइन । नाफिज कार्य समिति १३ सदस्यीय हुनेछ । शनिबार सम्पन्न महासभाले एक अध्यक्ष, दुई उपाध्यक्ष, एक महासचिव, एक सचिव, एक कोषाध्यक्ष र चार सदस्य गरि १० सदस्य निर्वाचित गरेको छ । 

निर्वाचन समिति संयोजक कपिलदेव ढकालका अनुसार उपाध्यक्षमा पिताम्बरी खतिवडा (प्रमिला) र निरोजकुमार थापा निर्वाचित भएका छन् । खतिवडाले एक सय चार र थापाले ९३ मत प्राप्त गरेका थिए । उनीहरूको प्रतिस्पर्धी परमेश्वर अधिकारीले ९२ र विजय दमासेले ६५ मत प्राप्त गरेका थिए । 

यसैगरी, महासचिवमा निकेश खत्रीले एक सय १२ मत प्राप्त गरि विजयी भएका छन् । उनका प्रतिस्पर्धी नविन ढुंगानाले ६६ मत प्राप्त गरेका थिए । सचिवमा भने राजाराम न्यौपाने निर्वाचित भएका छन् । उनले १२६ भोट ल्याउँदा उनका प्रतिस्पर्धी चेतनारायण पाण्डले भने ५७ मत प्राप्त गरेका थिए । 

कोषाध्यक्षमा भने नयाँ पत्रिकाकर्मी मिलन विश्वकर्मा निर्वाचित भएका छन् ।  विश्वकर्माले एक सय दुई मत ल्याउँदा उनका प्रतिस्पर्धी भोला देवकोटा (परिवर्तन) ले ८३ मत ल्याएका थिए । 

यस्तै, सदस्यमा अनिस मिजारले एक सय २०, अनुप आचार्यले एक सय १८, चित्रराज भण्डारीले एक सय १६ र शुक्र गिरीले एक सय सात मत ल्याएर बिजयी भएका छन् । नाफिजको विधानअनुसार यसअघिका अध्यक्ष मोदनाथ ढकाल निवर्तमान अध्यक्षको रुपमा कार्य समितिमा रहनेछन् । बाँकी दुई सदस्य भने नयाँ कार्य समितिले मनोनित गर्नेछ ।