बागलुङमा पिकअप जिप दुर्घटना : पाँचजनाको मृत्यु, एकजना घाइते 

बागलुङको जैमिनी नगरपालिका– ८ छिस्तीबाट सदरमुकाम बागलुङ बजार आउँदै गरेको पिकअप जिप दुर्घटना भएको छ । जिप जैमिनी नगरपालिका– ७ जैदी हर्देवा पाखामा दुर्घटना भएको छ । दुर्घटनामा पाँचजनाको घटनास्थलमा नै मृत्यु भएको छ भने एकजना घाइते भएको जिल्ला प्रहरी कार्यालयका प्रहरी निरीक्षक एवं सूचना अधिकारी केशव थापाले जानकारी दिए ।

ग.२च ९२४७ पिकपअ भ्यान सडकदेखि झन्डै पाँच सय मिटर तल खसेको बताइएको छ । छिस्तीको केवैखानीबाट बागलुङ बजारका लागि जिप छुटेको थियो । दुर्घटनामा चालकसहित दुई महिला र तीन पुरुष गरी पाँचजनाको घटनास्थलमा नै मृत्यु भएको प्रहरीले जनाएको छ। मृत्यु हुनेमा जिपचालक जैमिनी नगरपालिका– ८ केवईका ३८ वर्षीय महेन्द्र पुन, सोही स्थानका २० वर्षीया रश्मी श्रीष, ५० वर्षीया नन्दकली पुन, १७ वर्षीय नीरज श्रीष र ७५ वर्षीय कुलप्रसाद श्रीष रहेका छन् ।

दुर्घटनामा सोही स्थानका ४५ वर्षीय गंगाबहादुर श्रीष घाइते भएका छन् । घाइतेको उपचारका लागि धौलागिरी अस्पताल बागलुङ पठाइएको जिल्ला प्रहरी कार्यालय बागलुङले जनाएको छ । दुर्घटना के कारणले भएको भन्नेबारे प्रहरीले थप अनुसन्धान गरेको छ ।