- वि.सं २o८१ असार २० बिहीबार
उत्पादनमूलक क्षेत्रलाई पुनर्कर्जा देऊ, उधारो कारोबारलाई नियमन गर
कोशीका उद्योगीले उत्पादनमूलक क्षेत्रलाई पुनर्कर्जा दिन तथा उधारो कारोबारलाई नियमन गर्ने व्यवस्था गर्न नेपाल राष्ट्र बैंकलाई सुझाव दिएका छन् । उद्योगीहरूले उद्योग संगठन मोरङमार्फत आर्थिक वर्षको मौद्रिक नीतिका लागि नेपाल राष्ट्र बैंकलाई सुझाव पठाएका हुन् ।
उद्योगीहरूले उधारो कारोबार नियमन गर्ने सम्बन्धमा प्रस्ट नीति बनाउनुपर्ने, उधारो नतिर्ने व्यवसायीलाई कालोसूचीमा राख्नुपर्ने र अनिवार्य लेखापरीक्षणा रिपोर्ट सार्वजनिक गर्नुपर्ने व्यवस्था मौद्रिक नीतिमार्फत गर्न सुझाव पठाएका छन् । त्यस्तै कृषि, साना, मझौला तथा घरेलु उद्योगसमेतलाई सहुलियत दिन स्थापना गरिएको पुनर्कर्जाको व्यवस्था पुनः खुला गरिनुपर्ने, उत्पादनमूलक उद्योगका लागि पुनर्कर्जाको निश्चित रकम छुट्याइनुपर्ने र मापदण्ड पूरा गर्ने सबै उत्पादनमूलक तथा एसएमईलाई समानुपातिक रूपमा कर्जा वितरण गर्ने व्यवस्था गर्नसमेत उनीहरूले सुझाव दिएका हुन् ।
संगठनका अध्यक्ष राकेश सरानाले आगामी मौद्रिक नीतिका लागि उद्योगी व्यवसायीका माग तथा सुझाव समेटेर राष्ट्र बैंकमा पठाइएको बताए । उत्पादनमूलक उद्योगमा प्रवाह भएको कर्जाको ब्याजदर कम्तीमा पाँच वर्षका लागि स्थिर गर्न, ऋण तिर्ने समयसीमा ०८६ सालसम्म बढाउन, भुक्तानीको समय १० वर्षबाट १५ वर्ष पु¥याउन, उत्पादनमुखी उद्योग र कृषि उत्पादन तथा प्रशोधन उद्योगमा दिइएको कर्जामा जोखिम भार तथा कर्जा नोक्सानी व्यवस्थामा छुट गर्नसमेत उद्योगीहरूले माग गरेका छन् ।
