- वि.सं २o८१ असार १९ बुधबार
लोकतान्त्रिक समाजवादी पार्टी (लोसपा) नेपालले नेपाली कांग्रेस र नेकपा (एमाले)बीच राष्ट्रिय सहमतिको सरकार गठन गर्न भएको सहमतिलाई सकारात्मक भन्दै त्यसको समर्थन गरेको छ।
पार्टी केन्द्रीय कार्यालयमा बुधबार बसेको पदाधिकारी बैठकले पछिल्लो राजनीतिक घटनाक्रमको समीक्षा गर्दै नयाँ सहमति गरेका राजनीतिक दलसँग सत्तासहकार्य गरेर जाने निर्णय पनि गरेको छ।
बैठकले कांग्रेस र एमालेबीच भएको सहमतिअनुरूप गठन हुने सरकारलाई समर्थन गर्ने निर्णय गरेको प्रमुख सचेतक रामप्रकाश चौधरीले जानकारी दिए। उनका अनुसार बैठकमा पार्टी अध्यक्ष महन्थ ठाकुरले मंगलबार कांग्रेस सभापति शेरबहादुर देउवासँग भएको छलफलबारे जानकारी दिएका थिए।
सचेतक चौधरीले विगतमा पनि कांग्रेससँग सहकार्य गरेकाले सोही दल सम्मिलित नयाँ गठबन्धनमा मिलेर काम गर्न कुनै समस्या नहुने बताए।
