६ हप्ताभित्र न्युयोर्कको नाउसा रंगशाला खाली गरिने

पहिलोपटक टी–२० विश्वकप आयोजना गरेको अमेरिकाले न्युयोर्कको नाउसा काउन्टी रंगशाला ६ हप्ताभित्र ‘डिसमेन्टल’ खाली गरिने भएको छ । अमेरिकाले विश्वकपका १६ खेल आयोजना गर्ने अवसर पाएको थियो । जसमध्ये अब फ्लोरिडामा मात्र दुई खेल बाँकी छ ।

न्युयोर्कमा अब कुनै खेल छैनन् । सुपर एटदेखि फाइनलसम्म सबै खेल वेस्ट इन्डिजमा हुने आइसिसीले जनाएको छ । अमेरिकाले न्युयोर्कको नाउसा रंगशाला केवल एक सय ६ दिनमा तयार गरेको थियो । यो केवल विश्वकपभरि मात्र प्रयोग गरिने यसअघि नै बताइएको थियो । 

६ सातापछि यहाँ खाली मैदान मात्र हुनेछ । यद्यपि, पिच र आउटफिल्ड यथावत् रहनेछ । अमेरिकाले नाउसा रंगशालालाई मोड्युलर ढाँचामा बनाएको हो । यहाँ प्रयोग भएको पिच अस्ट्रेलियामा बनेको थियो । यसको भौतिक संरचना फर्मुला वानका हुन् । नाउसा रंगशालामा आठ खेल भएको थियो । यहाँको पिचमा अस्वाभाविक बाउन्स हुने गरेको थियो । पिचमा प्रतिओभर ५.७४ रनरेटमा ब्याटिङ भयो ।