![](https://nayapatrika.blr1.cdn.digitaloceanspaces.com/news/images/aparad2024-06-12-08-59-37.gif)
आकर्षक रोजगारमा कम्बोडिया, न्युजिल्यान्ड, फ्रान्सलगायत देश पठाइदिने प्रलोभनमा तीन सयभन्दा धेरैबाट १५ करोड रुपैयाँ ठगी गर्ने गिरोहका तीन सदस्यलाई प्रहरीले पक्राउ गरेको छ । पक्राउ पर्नेमा चितवनको भरतपुर महानगरपालिका– १८ का २८ वर्षीय राजकुमार भट्ट, कास्की माछापुच्छ्रे गाउँपालिका– ८ का २२ वर्षीय नवीन विक र पोखरा महानगरपालिका– ८ का २३ वर्षीय पवन पन्त छन् ।
काठमाडौं अपराध अनुसन्धान कार्यालयबाट खटिएको प्रहरी टोलीले उनीहरूलाई पक्राउ गरेको हो । प्रहरीका अनुसार उनीहरूले फेसबुक, म्यासेन्जर, ह्वाट्सएपलगायत सामाजिक सञ्जालमा फेक आइडी प्रयोग गरी रोजगारको जाली विज्ञापन सार्वजनिक गर्थे । सम्पर्कमा आएका युवालाई बैंक खातामा रकम जम्मा गर्न लगाउँथे । उनीहरूले तीन सयभन्दा बढीबाट १५ करोड रुपैयाँभन्दा धेरै रकम ठगी गरेको अनुसन्धान कार्यालयका प्रमुख सानुराम भट्टराईले जानकारी दिए । ‘सामाजिक सञ्जालबाट आकर्षक रोजगार खुलेको विज्ञापन गर्ने रहेछन् । सम्पर्कमा आएका युवालाई रकम जम्मा गर्न बैंक खाता दिएपछि सम्पर्कविहीन बन्ने रहेछन् । उनीहरूले तीन सयभन्दा धेरैबाट १५ करोडभन्दा धेरै ठगी गरेको अनुसन्धानबाट देखिन्छ,’ उनले भने ।
प्रहरीका अनुसार रोजगारमा जान तयार युवाबाट रकम संकलन गर्न उनीहरूले छुट्टै एकाउन्टेन्ट राखेका थिए । सोही एकाउन्टेन्टको खातामा सम्पर्कमा आएका युवालाई रकम जम्मा गर्न लगाउँथे । जम्मा भएको रकम बुझ्न उनीहरूले एकाउन्टेन्टलाई चेक काट्न लगाउँथे । यसका लागि मासिक ४० हजार रुपैयाँ तलब दिने गरेका थिए । प्रहरीले एकाउन्टेन्टलाई पनि पक्राउ गरेको छ । उनीहरूले भिसा प्रोसेसिङ भइरहेको भन्दै भिसा, वर्क पर्मिट, होटेल बुकिङ, पुलिस रिपोर्टलगायत फेक कागजात देखाई टिकट र डलर साट्ने भन्दै प्रतिव्यक्ति पाँच लाखदेखि १० लाखका दरले रकम उठाएर सम्पर्कविहीन हुने गरेको र हालसम्म १५ करोडभन्दा बढी रकम ठगी गरेको खुल्न आएको प्रहरीको भनाइ छ ।