- वि.सं २o८१ बैशाख २३ आइतबार
कर्णाली प्रदेशका मुख्यमन्त्री यमलाल कँडेलले सानो आकारको मन्त्रिमण्डल आज गठन गर्ने भएका छन् । आज मुख्यमन्त्री कँडेलले एमाले र माओवादी केन्द्रका एक–एकजना सहभागी गराएर मन्त्रिमण्डल गठन गर्न लागेका हुन् ।
कर्णाली प्रदेशमा नेकपा माओवादी केन्द्रका तर्फबाट रणसिं परियार मन्त्री बन्ने निर्णय भएको माओवादीका प्रदेश सभाका सांसद तथा पूर्वआन्तरिक तथा कानुनमन्त्री कृष्णबहादुर जिसीले जानकारी दिए । ‘आज बिहान बसेको माओवादी संसदीय दलको बैठकले परियारलाई सरकारमा पठाउने निर्णय गरेको हो,’ उनले भने, ‘मन्त्रालयको टुंगो भने लगाइएको छैन ।’
आज माओवादीको तर्फबाट परियारलाई पठाउने, मन्त्रालय र बाँकी मन्त्रीको टुंगो मुख्यमन्त्री यमलाल कँडेलले विश्वासको मत लिइसकेपछि छनोट गरिने जिसीले बताए। मुख्यमन्त्री कँडेलले बिहीबार विश्वासको मत लिएपछि मन्त्रिमण्डलले पूर्णता पाउने बताएका छन् ।
त्यस्तै, आज एकजना एमालेका तर्फबाट पनि मन्त्रिमण्डल सहभागी हुने एमाले कर्णाली प्रदेश संसदीय दलले जनाएको छ।
