खेलकुद प्रिन्ट संस्करण

नेपाललाई फ्रेन्डसिप टी–२० उपाधि 

नेपालले प्रस्तुत गरेको १७७ रनको लक्ष्य पछ्याएको गुजरातले २० ओभरमा आठ विकेट गुमाउँदै १५८ रन बनायो

नेपाली राष्ट्रिय क्रिकेट टोलीले आइतबार फ्रेन्डसिप कप टी–२० प्रतियोगिताको उपाधि जितेको छ । नेपालले भारतको रणजी ट्रफी खेल्ने गुजरातलाई १८ रनले हराउँदै उपाधि जितेको हो । नेपालले प्रस्तुत गरेको १७७ रनको लक्ष्य पछ्याएको गुजरातले २० ओभरमा आठ विकेट गुमाउँदै १५८ रन मात्रै बनाउन सक्यो । गुजरातका कप्तान उमांग रोहितकुमारले सर्वाधिक ४० रन बनाए । उनले २८ बलमा दुई चौका र दुई छक्का प्रहार गरेका थिए । यसैगरी, आर्य देसाईले ३६ रन जोड्न २४ बलमा चार चौका र दुई छक्का प्रहार गरेका थिए । 

गुजरातका रुद्र पटेलले १७ रन जोडे । जयमित पटेल र हर्ष देसाईले समान १५ रन बनाए । नेपालका अभिनाश बोहराले चार ओभरमा २६ रन खर्चेर तीन विकेट लिए । दीपेन्द्रसिंह ऐरीले चार ओभरमा १३ रन खर्चेर दुई विकेट लिए । यसैगरी, करण केसी र कुशल मल्लले समान एक विकेट लिए । टस जितेर ब्याटिङ गरेको नेपालले २० ओभरमा चार विकेट गुमाउँदै १७६ रन बनाएको थियो । नेपालका कप्तान रोहित पौडेलले सर्वाधिक ७४ रन जोडे । उनले ४७ बलमा पाँच चौका र चार छक्काको सहयोग लिए ।

ओपनर आसिफ शेखले ३४ बलमा दुई चौका र एक छक्कासहित ३४ रन बनाए । कुशल भुर्तेलले २१ बलमा १९ रन बटुलेका थिए । कुशल मल्लले १३ बलमा दुई चौका र दुई छक्काको सहयोगमा ३१ रन बनाए । सन्दीप जोरा ७ रनमा नटआउट रहे । मध्यक्रमका दीपेन्द्रसिंह ऐरी ७ रन बनाएर आउट भए । गुजरातका स्नेह पटेल, तेजास पटेल, जयमित पटेल र जाला युवराज सिंहले समान एक विकेट हात पारे ।

आयरल्यान्डविरुद्ध अर्जुनको शतक
ओपनर अर्जुन कुमालको शतकको बाबजुद नेपाल ‘ए’ तेस्रो तथा अन्तिम एकदिवसीय खेलमा आयरल्यान्ड ‘ए’सँग ६९ रनले पराजित भएको छ । त्रिवि क्रिकेट मैदानमा नेपालले सिरिजमा तीनवटै खेल गुमाएको हो । नेपाल पहिलो खेलमा २७ रन र दोस्रोमा ११४ रनले पराजित भएको थियो । आयरल्यान्डले प्रस्तुत गरेको २८५ रनको लक्ष्य पछ्याएको नेपाल ३९.४ ओभरमा २१५ रनमा अलआउट भयो । ओपनर अर्जुनले ११८ बलमा १४ चौकासहित १०२ रनको शतकीय इनिङ्स खेलेका थिए । 

लिस्ट ‘ए’मा उनको पहिलो शतक हो । उनले यसअघि यू–१९ मा दुई शतक जोडेका छन् । नेपालको ब्याटिङमा अर्जुन साउदले ३० बलमा चार चौका र तीन छक्काको सहयोगमा ३६ रन बनाए । आयरल्यान्डका बेन ह्वाइटले १० ओभरमा ६२ रन खर्चेर पाँच विकेट लिए । 

टस जितेर ब्याटिङ रोजेको आयरल्यान्डले ५० ओभरमा नौ विकेट गुमाउँदै २८४ रन बनाएको थियो । आयरल्यान्डको जितमा स्टेफन डोहेनीले १०७ रनको योगदान दिए । उनले एक सय २९ बलमा आठ चौका र दुई छक्का प्रहार गरेका थिए । पिटर मुरले ४४ रन बनाउन २५ बलमा दुई चौका र पाँच छक्का प्रहार गरे । नेपालका लागि रञ्जित कुमारले १० ओभरमा ५१ रन खर्चेर तीन विकेट लिए । रिजन ढकालले १० ओभरमा ७५ रन खर्चेर तीन विकेट लिए । 

वेस्ट इन्डिजका रोड्रिक बलिङ सल्लाहकार
नेपाल क्रिकेट संघ (क्यान)ले सिनियर टोलीको बलिङ प्रशिक्षकका रूपमा वेस्ट इन्डिजका रोड्रिक ओ एस्टविकलाई नियुक्त गरेको छ । क्यानले आसन्न इमर्जिङ कप र आइसिसी टी–२० विश्वकप क्रिकेट प्रतियोगितामा सहभागिता जनाउनुअघि बलिङ प्रशिक्षकका रूपमा वेस्ट इन्डियन रोड्रिकलाई भित्र्याएको हो । नेपालका प्रशिक्षक मोन्टी देसाई र रोड्रिकबीच दोस्रोपटक सहकार्य हुन लागेको हो । मोन्टी वेस्ट इन्डिजका प्रशिक्षकका रूपमा रहँदा रोड्रिकले पनि सहयोग गरेका थिए । रोड्रिकले आठ वर्ष वेस्ट इन्डिजको सिनियर टोलीसँग काम गरेको अनुभव छ । उनले नेपालको टोलीसँग जोडिन पाउँदा गर्व लागेको बताएका छन् । ‘नेपाली क्रिकेटसँग काम गर्न पाउनु गर्वको विषय हो,’ उनले भने, ‘मेरो ज्ञान नेपाली खेलाडीलाई बाँड्न आतुर छु । अहिले नेपाली क्रिकेट निकै राम्रो छ ।’

रोड्रिकले एकपटक पनि वेस्ट इन्डिजको राष्ट्रिय टोलीबाट खेल्न अवसर पाएनन् । तर, ६२ वर्षीय रोड्रिकले करिअरमा ३७ पहिलो श्रेणी र ४२ लिस्ट ‘ए’ खेलेका छन् । प्रथम श्रेणीमा एक सय ४१ विकेट लिएका उनले तीन सय ७६ रन बटुलेका छन् । उनले लिस्ट ‘ए’ मा ४३ विकेटका साथै सय रन बनाएका छन् । नेपालको क्रिकेट माथि उकास्न आफूले सक्दो सहयोग गर्ने उनले जनाए । ‘नेपालको क्रिकेट माथि पुर्‍याउन दिलोज्यान दिएर सहयोग गर्नेछु,’ उनले भनेका छन्, ‘यसअघि नेपालका प्रशिक्षकसँग पनि काम गरेको अनुभव छ ।’ रोड्रिकले नेपालको ड्रेसिङ रुमलाई ह्याप्पी रुमका रूपमा प्रशंसा गरेका छन् । 

‘मोन्टीसँग सहकार्य गर्दा सधैँ ह्याप्पी ड्रेसिङ रुमको अवधारणा पाएको थिएँ, अहिले पनि यही नेपालको टोलीमा छ,’ उनले भने । यसैगरी प्रशिक्षक मोन्टीले टोलीमा एक अनुभवी व्यक्ति भित्र्याउन पाउँदा खुसी लागेको बताएका छन् । ‘खुसी लागेको छ, रोड्रिकको आगमनले हाम्रो ह्याप्पी ड्रेसिङ रुम झनै मजबुत हुनेछ,’ उनले भने, ‘हामी सबैको प्रयास नै नेपाली क्रिकेटर र समर्थकलाई खुसी पार्नु हो ।’